Calea y Diañu Blues entamen les sos xires esti fin de selmana
Esti sábadu 9 arranquen nueves xires de grupos de la música’l país. Amás de la de La Tarrancha o la continuación de la xira de Baxel, hai dos bandes qu’entamen a dar una montonera de conciertos. Per un llau ta Calea, el tríu de música tradicional formáu por Leticia Baselgas, Silvia Quesada y Rubén Bada, que van actuar a les 19.30h nel Teatru Riera de Villaviciosa y que tienen nueve feches confirmaes hasta’l momentu. Pel otru llau ta Diañu Blues, formación xixonesa de rock y blues que tien siete conciertos confirmaos y el primer d’ellos va ser esti sábadu a les 19.30h en Plaza de La Panerina de Grau.
Calea ye un grupu formáu esti 2022 por estos tres nomes bien conocíos dientro de la escena folk. Rubén Bada presenta esta formación como «un grupu vocal onde cantemos toos y qu’anque usemos instrumentos novedosos que nun tamos avezaos a ver na música asturiana, se vuelva a les armoníes modales; ye dicir, a recuperar la voz vieya d’esta tierra». Les primeres feches de la xira pueden vese nesti cartelu:
Diañu Blues ye un banda xixonesa formada en 2017 que tien la particularidá de ser la primer -y única- formación n’interpretar blues cantando dafechu n’asturianu. Depués d’un llustru pisando escenarios, publicaron en 2021 nes plataformes dixitales el so primer material grabáu; cuatro cantares agrupaos en dos EP, ‘Collacios’ y ‘El Bail.le’. «Son canciones propies y dalguna adaptación al asturianu de clásicos del blues», comenta’l guitarrista y cantante, Pablo Nogueiro, sobre estos temes grabaos, matizando que «son cancios cuasi de chigre; nun somos del Missisipi, nun somos negros, entós pa nós lo del blues ye dalgo que nos presta la música, pero somos d’Asturies y hai que facelo afayadizo pa la xente». Les sos primeres feches confirmaes puen vese nesti cartelu:
