La nueche d’ánimes aportó a la música asturiana con una novedá discográfica: Ente llobos… de Taranus. La banda folk-metal vuelve con cinco cantares nuevos cuasi una década dempués de qu’asoleyaren Ánima. Nesti EP publicáu en plataformes musicales reflexen «un soníu metaleru muncho más cuidáu y contundente» pero calteniendo «la esencia del puru estilu Taranus», como desplica’l guitarrista y vocalista de la banda, Antonio Carballo.
«Les lletres viaxen del amor a la reivindicación, ensin escaecer los cuentos máxicos nin la tenrura d’una añada«, comenta’l músicu sobre estes canciones nes que tienen «muncha importancia les flautes, la gaita y la voz«. Asina ye como ‘Bruxa’, ‘Ánxel’, ‘Llobu’, ‘Ánima’ y ‘La Lleenda’l Nordés’ dan forma ta un EP de cuasi media hora de duración que foi grabáu nos Estudios Dynamita a los mandos de Dani G.
Xunto a Susana Gudín (voz), Fran Álvarez (gaites en Do y Si♭, gaita MIDI, flauta travesera y whistles), Diego Martino (baxu), Xesús Nel García (guitarra eléctrica), Marco Álvarez (batería), y Antonio Carballo (guitarra eléctrica, guitarra acústica y voz), andechó’l «pequeñu gran gaiteru Rodrigo Carballo«, un rapacín de la Banda Gaites Saxum de Xixón que fizo unes melodíes de gaita en ‘La Lleenda’l Nordés’.
«Xusto enantes del andanciu tábemos preparaos pa grabar estos cantares. Tuvimos que parar y, nel trescurrir d’esti tiempu, camudamos de gaiteru y la vida personal de cadún fizo que tuviéramos qu’esperar más de lo que quixéramos pa volver xuntanos», desplica’l guitarrista en rellación a los nueve años de diferencia ente’l so trabayu anterior y esti. Sicasí, el músicu destaca que foi «enorme la ilusión» que-yos fizo grabar estos cantares y que tán «mui arguyosos d’ellos, porque marquen la evolución del grupu«.
Entá nun tienen conciertos a la vista -«tuvimos mui centraos na grabación y dimos-y muncha importancia a esti procesu», esclaria Antonio Carballo-, pero yá tienen en mente «abrir l’axenda pa entamar colos directos«. Amás, el músicu afirma que siguen ensayando y «preparando temes nuevos pa la segunda parte d’esti EP«. Tienen intención de llanzalu l’añu que vien, asina que dempués d’esti parón va siguir habiendo más Taranus nos escenarios y nos estudios de grabación.
Taranus ye la única formación folk-metal qu’hai n’Asturies. La banda debutó en 2012 con un discu homónimu ente los que s’alcuentra Ensin ti, cantar que ganó esti añu’l Premiu Camaretá al Meyor Cantar en Llingua Asturiana que convoca’l gobiernu asturianu. Tres de la incorporación de la soprano Susana Gudín a la voz publicaron Ánima, un álbum d’ocho cantares qu’incluyía composiciones propies amás de versiones de temes de Beleño, Brenga Astur y otros bien populares como l’añada ‘Agora Non’ o’l himnu antifacista ‘Bella Ciao’. Con Ente Llobos… siguen caleyando per esa sienda única qu’abrieron dientro de la música n’asturianu.
Suscríbite a les nuestres novedaes
