“Tengo de Xubir al Puertu”, nuevu videoclip de Llevólu’l Sumiciu
“Saldiguera“, “Muncho Quixera Tener“, “Salir Moces a Bail.lar” y agora, “Tengo de Xubir al Puertu“. El dúu de música electrónica asturiana Llevólu’l Sumiciu estrenó’l pasáu xueves n’esclusiva en Radio Gladys Palmera el so cuartu videoclip, que yá ta disponible pa tol mundu en YouTube. «Na nuesa interpretación mecemos esti cantar con imaxes del documental “Tierra Negra” pa falar de dos de les realidaes más dures de la nuesa tierra: la rural y la minera», comenten los dos hermanos que formen esti proyectu musical.
Llevólul’l Sumiciu ye un grupu que naz en 2020 cola intención d’amestar música asturiana y electrónica. El proyectu tá formáu polos hermanos Pablo y David Alonso, que s’encarguen de les estayes musical y visual respectivamente. Defínense como un proyeutu audiovisual au la imaxe y la música s’entemecen pa reinterpretar l‘imaxinariu asturianu de forma esperimental. Pa la parte visual, inspírense n’imaxes d’archivu que reflexen el costumismu de los años 70 y 80, el patrimoniu mineru y industrial y de xemes en cuando’l trabayu d’artistes llocales. La parte sonora básase en cantares tradiciones acompañaos por ritmos de reggaeton o baille funk y bones dosis de distorsión y glitches.
‘Entaína‘ ye’l primer EP de la formación. Asoleyáu pol sellu berlinés Samaín Music, ye un trabayu con seis cantares que, como ellos mesmos dicen, «restolen pente la música y lo visual, pente l‘Asturies natal y el Caribe, pente‘l pasáu y el futuru». Con ‘Entaína‘, la música asturiana renuévase y cantares de formaciones como Nuberu, D’Urria, Xaréu Folk o Grupu Trasgu suenen más actuales y mestizos gracies a la revisión que faen d’ellos Llevólu’l Sumiciu fusionándolos con ritmos afrollatinos y electrónicos.
