Tever reivindica’l Ramu Nadal col so llanzamientu nuevu

El gaiteru Tever remata l’añu asoleyando un nuevu llanzamientu na so canal de YouTube: «Ramu Nadal«. Con esti single quien reivindicar con música esta tradición n’Asturies y pa ello usa dos pieces del Cancioneru de Torner -«No hay tal andar» y «Los pastores y pastoras»-, reinterpretándoles a mou de villancicu.

«El ramu Nadal (o ramu de Navidá) ye un ornamentu d’orixe paganu recuperáu nos caberos años pel Nadal. N’Asturies, les presencies constataes más antigües tán en Cuñaba, Peñamellera baxa, Cangas del Narcea ya Ibias«, desplica Tever na descripción d’esti videoclip. Nella tamién plantega que «el ramu consiste nuna cadarma de madera de forma triangular, fechu con fueyes de texu, abetu o carrascu nel que s’alluguen 12 veles simbolizando los meses del añu».

«Del mesmu cuelguen estremaes ofrendes, como chorizos, rosquielles y frutes, asina como elementos ornamentales como filos de llana, puntilles, bordaos. L’armazón principal sofítase nuna vara madera allugada verticalmente con una peana que fai de sofitu pa tola cadarma. Tamién, al pie del ramu, suel ponese un cestu con castañes o nueces. N’otres zones pue ser semicircular o cuadráu», conclúi’l gaiteru na presentación d’esti villancicu que tien un calter didácticu y navidiegu a la par.