Esti vienres 5 de setiembre a les 22.30h TPA estrena La quinta del biberón: el resurgir de la gaita, un documental que repasa la evolución de la gaita dende los años 80 del sieglu pasáu. 40 años nos que, según presenta la propia cadena, «la gaita asturiana entamó una tresformación ensin precedentes de la mano d’una serie de gaiteros xóvenes que l’adoptaron como forma de vida».
Producíu por Videoreport y dirixíu por Marcos García, el documental «percuerre más de cuatro décades d’evolución musical, cultural y social, a traviés de la carrera d’una xeneración nueva de gaiteros que rescató esti instrumentu tradicional del escaezu y lu proyectó hacia’l futuru», como presenta RTPA. Ente les persones qu’apaecen tán figures como Xuacu Amieva, Hevia, José Manuel Tejedor, Vicente Prado ‘El Pravianu’, José Manuel Fernández ‘Guti’, Berto Varillas o Belén Arboleya.
A traviés d’entrevistes, archivos inéditos y actuaciones históriques, «el documental recupera una parte esencial del patrimoniu musical d’Asturies y homenaxea a quienes, con talentu y determinación, marcaron el camín pa les nueves xeneraciones», recueye RTPA nel testu de presentación d’una obra «que non documenta namás una evolución musical, sinón tamién una historia d’identidá, resistencia y renovación«.
En La quinta del biberón: el resurgir de la gaita va poder vese como «en metá d’un mundu cada vez más globalizáu, la gaita enfrenta retos nuevos: caltener viva la esencia de la tradición ensin renunciar a la innovación«, plantega la canal pública asturiana que, a traviés de les sos redes sociales, yá amosó dalgún fragmentu del documental qu’inclúin declaraciones de persones como Juaco López, director del Muséu del Pueblu d’Asturies, o Chus Pedro Suárez de Nuberu.
Suscríbite a les nuestres novedaes
