La nueche del pasáu 1 de xineru TPA inauguraba l’añu estrenando una producción propia onde la música asturiana foi la protagonista: la película-documental Asturias, el viaje de una canción. Tres l’éxitu del so estrenu, la cadena pública tovía nun xubió la obra audiovisual a TPA a la Carta y lo que va facer ye repitir emisión esti sábadu. A les 18.55h del 6 de xineru va poder vese esta película protagonizada por, ente otros, Víctor Manuel, Chus Pedro, Nacho Vegas, Marisa Valle Roso y Leticia Baselgas y Rubén Bada de L-R.
En plena guerra civil, el poeta castellano-andaluz Pedro Garfias escribió dende’l frente un poema d’urxencia al enterase de qu’Asturies acababa de caer en manes del exércitu franquista. Tres décades dempués, un xoven Víctor Manuel conoció esos versos de pela boca del exiliu asturianu en Méxicu y los musicó, con urxencia asemeyada, dando forma a un cantar perguapu qu’acabó por convertise nel himnu oficiosu d’Asturies.
José Braña y Chus Neira realizaron el documental Asturias, el viaje de una canción, qu’esplora la xénesis del testu y de la canción y qu’acompaña a cinco músicos asturianos nun viaxe a esa Andalucía onde nacieron les pallabres de Garfias pa recrear la composición xunto al propiu Víctor Manuel, al productor xixonés Paco Loco, figura histórica de la escena indie asturiana y española, y a Joaquín Pascual (Surfin’ Bichos). Chus Pedro, Nacho Vegas, Marisa Valle Roso y el dúu L-R formáu por Leticia Baselgas y Rubén Bada protagonicen la cinta, nun amiestu ente road-movie o rockumentary que viaxa al centru de les emociones de la identidá asturiana.
Suscríbite a les nuestres novedaes
