Güei a les 19.30h el Centru de Cultura Antiguu Institutu de Xixón acueye’l conciertu d’apertura de los XIII Alcuentros de Músiques Asturianes, ciclu entamáu pola Oficina de Normalización Llingüística de Xixón y el Taller de Músicos de Xixón qu’hasta’l 13 de xunu va programar seis actividaes gratuites rellacionaes cola música’l país. Anabel Santiago ye l’artista encargada d’abrir estes xornaes que mañana tamién acueyen l’alderique Miraes de muyer na música asturiana.
Nel conciertu d’esta tarde, Anabel Santiago va tar acompaña de la so banda habitual y del grupu de pandereteres Compañeras. Dende la organización del ciclu avancen que la vocalista «va incluyir nel repertoriu del conciertu cantares del so proyeutu musical nuevu, que va ver la lluz na seronda de 2025″ y facer un «alcuentru musical íntimu y cercanu» nel que «fai un repasu pela música tradicional, revisitada y versionada con estilos estremaos de cantares asturianos, gallegos y ibéricos».
Mañana continuaba la programación d’estos alcuentros col coloquiu Miraes de muyer na música asturiana. Sicasí quedó canceláu «por causes ayenes a la Fundación Municipal de Cultura, Educación y Universidá Popular» según indicaron nuna nota prensa..
Pa la selmana que vien los XII Alcuentros de Músiques Asturianes siguen. El miércoles 4 de xunu a les 19h el tríu folk Picarós va presentar el so primer trabayu Son d’Ermu nel Muséu Casa Natal de Xovellanos y el xueves 5 a les 19.30h nel CCAI ye la presentación del llibru Diarios d’Una Panderetera na qu’intervienen l’autora Leticia Baselgas, la editora Alicia Álvarez y el músicu y musicólogu Llorián García.
Completen l’axenda en dos selmanes el conciertu de Cubasturia Jazz -cuartetu qu’entemez la música tradicional d’Asturies col jazz cubanu- el miércoles 11 a les 19.30h nel CCAI y el vienres 13 a les 20h «una tarde en danza al mou Xixón» cola participación de Soi Panderetera -agrupación formada pol alumnáu de la EMT La Quintana- y del cuartetu Rollu Folk.
Na edición d’esti añu los Alcuentros de Músiques Asturianes busquen «incentivar intercambios y reflexones al rodiu de les distintes manifestaciones estilístiques de la música asturiana d’anguaño». D’esta manera amesten «voces bien consagraes de la escena con otres formaciones de más recién creación» y recueyen tamién «la reinterpretación de lo asturiano dende una mirada internacional«. Too ello entemeciento dellos formatos y espacios «p’amosar la pluralidá, bayura y bona salú de la música asturiana, na so diversidá«.
Suscríbite a les nuestres novedaes
