Nueva persecución dende les instituciones públiques a la música. Esta vegada aporta dende Tinéu, onde gobiernen con mayoría absoluta PP y Vox. Según denunció’l músicu David Varela nes sos redes sociales «L’equipu de gobiernu del Conceyu tien previsto nel plenu d’esti xueves 29 de mayu, amortizar les cuatro places pendientes d’estabilización na Escuela Municipal de Música». Eso supón la non renovación d’eses places y la perda de cuatro puestos de trabayu alegando razones presupuestaries pol «déficil económicu d’esti serviciu cultural». Sicasí, la realidá amuesa que demanda hai y l’accesu a la cultura y a la educación ye un derechu.
«Les places pa usuarios tán dafechu ocupaes, cola demanda educativa cubierta, ya inclusive con llista d’espera en delles asignatures. Hai comunidá. Hai alumnáu. Hai necesidá«, sorraya esti músicu xixonés que lleva ventiún cursos dando clase en Tinéu y qu’insiste en qu’él «tien llista d’espera; el profe de gaita y tambor tien llista d’espera; el de guitarra tien llista d’espera». D’esta manera, si l’aprobación del presupuestu municipal va palantre «nun van acabar namás colos empleos; va pesllase un espaciu de formación, d’espresión y d’alcuentru. Un serviciu públicu que foi parte del motor de cultura, dinamización y socialización en Tinéu», como denuncia Varela.
La situación nun ye nueva: «Cuando marchó ‘l mayestru de clarinete va dos años yá nun contrataron a otru. Quedaron los guah.es ensin clase de clarinete y marcharon pa Salas y pa Cangas. Cuando marchó la profe de flauta ya nun contrataron a otra…», desplica’l músicu sobre una realidá qu’amás ye «contraria a la normativa vixente«. «Tábemos a puntu d’estabilizar, porque va menos d’un mes salió la conformación del xuráu que tenía qu’evaluar la mio oposición pa la plaza, pa que fuera mía y nun tuviera qu’andar pasando más oposiciones cada pocos años. Amás tenemos una sentencia de fai como 10 años na que nos facíen fixos discontinuos, asina que tán saltándose too a la torera y ye un despidu improcedente dafechu».
«Na Escuela de Cangas de Narcea llevo dende’l 2017, tengo’l mesmu contratu qu’en Tinéu, ellí tamién gobierna’l PP y nun tuvieron nengún problema n’estabilizanos y echar palantre toes y caúna de les places de la Escuela Música», añade David Varela pa esclariar l’anormalidá de la situación de Tinéu, un conceyu nel que’l gobiernu de PP-Vox «curiosamente» tamién «eliminó la posibilidá de matriculase na escuela de música n’asturianu, porque enantes podía facese en castellanu y n’asturianu».
Les muestres de solidaridá pa con Varela y el resto’l profesoráu afectáu tán llegando per estayes que van dende xente del sector musical hasta políticos de la Xunta Xeneral. Porque la realidá ye qu’esta decisión de PP-Vox va acuyá de torgar cuatro puestos de trabayu; tamién va a la escontra del derechu d’accesu a la cultura y a la educación de la población. Asina ye como les crítiques del músicu xixonés resumen perbién esto último: «Onde hasta’l momentu suenen acordiones, gaites, pandeiros, pianos o guitarres, axúntense xeneraciones y espoxeten vinculos… namás va quedar l’ecu del abandonu. Nun ye sólo una decisión alministrativa. Ye un güelpe a l’alma d’un pueblu».
Suscríbite a les nuestres novedaes
