Rodrigo Cuevas sigue arrasando. Tres toa una vida dedicada a la música, l’axitador folclóricu ta acabante de sumar una nueva distinción: el Premio Nacional de la Músicas Actuales 2023 que concede’l Ministeriu de Cultura. Esti reconocimientu súmase al Premiu Camaretá al Meyor Cantar en Llingua Asturiana (2020); al Mejor Artista Revelación y Mejor Álbum de Fusión y Músicas del Mundo nos Premios MIN de la Música Independiente (2020); premiu El Ojo Crítico de Radio Nacional d’España na categoría de Música Moderna (2021); y Premio Arcoiris del Ministeriu d’Igualdá (2022)
«La singularidá de la so obra con una propuesta trescendente qu’axunta música tradicional folclórica y música popular contemporánea: el so proyectu artísticu que tien un fuerte compromisu cola diversidá; y la intensidá de la so música en directo y el so imaxinariu personal dafechu», fueron les razones principales poles que’l xuráu premió a Rodrigo Cuevas. Esti xuráu tuvo formáu pol director xeneral del Instituto Nacional de las Artes Escénicas y de la Música (INAEM), Joan Francesc Marco; Manuel Ferrand director del Festival de Música española de Cádiz; Tomás Fernando Flores, director de Radio 3; la xestora cultural Almudena Heredero; Montserrat Portús, directora del Mercat de Música Viva de Vic; Diego Rodriguez de Juan, director y presentador del programa El sótano de Radio 3 y Carmen Zapata Corbalán, a propuesta de l’Asociación de Mujeres de la Industria de la Música.
Coindiciendo cola reciente publicación del so últimu trabayu, Manual de Romería, esti premiu reconoz toa una trayectoria dedicada a la música, yá que Rodrigo Cuevas (Uviéu, 1985) cursó estudios de piano y tuba nel Conservatoriu d’Uviéu y de Sonoloxía na Escola Superior de Música de Catalunya (ESMUC) de Barcelona. En 2012 entamó a actuar pel circuitu underground estatal; en 2016 publicó l’EP Prince of Verdiciu que lu llevó a la fama n’Asturies; llueu llegaron los espectáculos El Mundo por Montera, Trópico de Covadonga, la zarzuela Barbián, el discu Manual de Cortejo xunto a Raül Refree… hasta aportar hasta esti trabayu nuevu que na so primer selmana algamó entrar nel Top10 de los álbumes más vendíos nel Estáu español.
Premiu al asturianu, a la cultura popular y contra la censura
Ente les primeres valoraciones que fixo Rodrigo Cuevas en medios de comunicación, l’artista multidisciplinar destacó que d’esta manera ta premiándose a una llingua minorizada como l’asturiana y defendó la necesidá de la so oficialidá; destacó que la so música naz de xente del pueblu qu’enxamás recibió nengún premiu; y criticó la censura, poniendo d’exemplu que’l so nome foi ún de los que punxeron enriba la mesa los conceyales de VOX del Ayuntamientu de Xixón nel conflictu cola música n’asturianu qu’hubo esti branu na villa de Xovellanos.
Semeya de la noticia cedida por Ojos de Hojalata.
Suscríbite a les nuestres novedaes
