Una charra y conciertu d’Eva Tejedor en Llangréu abre la programación de payares d’Asturies Cultura en Rede
Esti fin de selmana entama la programación d’actividaes musicales de payares. Dientro de los distintos conciertos qu’hai, destaquen los eventos entamaos por Asturies Cultura en Rede, el circuitu cultural qu’entama la Sociedá Pública de Xestión y Promoción Turística y Cultural. Eva Tejedor ye la encargada d’abrir esti vienres 5, a les 17h, na Casa Los Alberti de Llangréu les actividaes de payares, nes que tamién va haber actuaciones de David Varela, Anabel Santiago, Alfredo González, Celso Díaz, Cesar Latorre y Mapi Quintana, amás de les charres de Xune Elipe presentando “Hai una Llínia Trazada”.
L’actividá cola que la histórica panderetera Eva Tejedor abre’l ciclu esti mes, destaca pola so novedá. Nella, amás d’un conciertu xunto a la so banda Les Pandereteres, va dar una charra esplicando d´oriente a occidente les maneres diferentes de tocar y los ritmos tradicionales tan variaos, p´averar al públicu a esti instrumentu tan desconocíu pero tan ricu en posibilidaes, amás del papel tan importante y imprescindible de la muyer na tradición oral.
Un añu de circuitu
N’ochobre del añu pasáu presentábase “Asturies Cultura en Rede“, el programa del Gobiernu del Principáu d’Asturies pa poner en marcha un circuitu cultural pelos distintos conceyos del país. La música y la cultura tradicional formen parte de la programación, amás de les artes escéniques, la lliteratura, el cine, les artes visuales y delles actividaes especiales coincidiendo col Xacobéu.
Nesti 2021, fueron más de 100 los conciertos que se programaron en más de 30 conceyos y la Sociedá Pública de Xestión y Promoción Turística y Cultural d’Asturies -responsable del circuitu- yá presentó toles actividaes hasta final d’añu, ente les que se pue cuntar más de 30 conciertos nos que la música n’asturianu ye protagonista.
L’axenda completa de toles actividaes pue consultase na web d’Asturies Cultura en Rede y la información sobre los conciertos d’artistes y agrupaciones que trabayen col asturianu como llingua vehicular ta disponible tamién n’axenda de musicasturiana.com.
