«Un rellatu curtiu, representáu por un actor a mou de monólogu interior; una colección de nueve cantares interpretaes en vivo; too dividío en cuatro actos que presenten una reflexón sobre’l procesu creativu d’un autor exiliáu voluntariamente nuna casa solitaria d’un pueblín asturianu». Asina preséntase Nueche d’insomniu. L’espectáculu, proyectu del cantautor Toli Morilla qu’axunta música, lliteratura y artes escéniques y que, venti años dempués del so estrenu, va volver a representase: esti vienres 10 en Llanes y el sábadu 31 d’ochobre en Xixón dientro del ciclu Ente Fueyes.
«Volver a sentilo y decatame de que tanto la trama como les canciones resisten el pasu’l tiempu«, foron les razones que Morilla sorraya pa volver a xubir a un escenariu con esti espectáculu. Según cunta’l cantautor nesta ocasión la obra «caltién el testu pal llabor actoral», pero no que cinca lo musical «les canciones tienen un traxe nuevu que surde del estudiu de l’armonia y teoría de la composición».
Asina ye como’l Casinu de Llanes va acoyer esti vienres a les 20h y el Teatru Xovellanos de Xixón el próximu 31 d’ochobre a les 20.30h, esta puesta n’escena nueva que Toli Morilla define como «un monólogu introspectivu, dramatizáu, falando del procesu creativu y el territoriu onde asoceden les coses. Y les canciones que fice colos poemes d’una bona parte d’autores asturianos y asturianes». Xulio Vixil, Mª Teresa González, Taresa Lorences, Xandru Fernández, Antón García, Mánfer de la Llera, Rosa Taurán ponen los testos; Antón Caamaño la interpretación; José Meren el fagot y Gloria Caamaño, Arancha Carcedo y Sara Méndez los coros. El resto fáilo esti veteranu cantautor acompañáu cola so guitarra y harmónica.
«Toles alcordances que tengo de va venti años son buenes y ente elles destaco la participación de José Lobato, el gran actor asturianu, como director d’escena», comenta Toli Morilla al rodiu la interpretación de Nueche d’insomniu d’hai dos décades; un espectáculu qu’acompañó a un discu d’estudiu col mesmu nome y que llueu quedaría rexistráu en directo y asoleyaría nel álbum Nueche d’insomniu: l’espectáculu. Nestos trabayos discográficos puen sentise dellos de los himnos de Morilla como ‘Na to cintura’, ‘Son de la l.luna’ o ‘Alluma’l to camín’.
Amás de los próximos conciertos de Llanes y Xixón, el cantautor yá interpretó esti espectáculu en Colunga, Corvera y Navia. El proyectu forma parte del circuitu Asturies Cultura en Rede y la intención de Morilla ye siguir llevándolo per otros teatros del país. Con esti show, el músicu -que ye’l más veteranu de la xeneración de cantautores posterior al Nuevu Canciu– sigue un llabor caracterizáu por una cuidada propuesta qu’entemez el rock acústicu, la canción d’autor y el folk. Tien una discografía que se remonta a 1998 y que ta formada por ocho referencies ente discos d’estudiu n’asturianu y castellanu, un directo, un compilatoriu y el CD de versiones de Bob Dylan n’asturianu.
Suscríbite a les nuestres novedaes
