Videoclips de música n’asturianu pa promocionar el turismu n’Asturies

Vuelve Asturias Sonora, una iniciativa de la estaya de Turismu del Gobiernu del Principáu d’Asturies pa promocionar Asturies per Facebook y YouTube a traviés de la música fecha nel país. El proyectu remóntase a 2019 cuando diez artistes grabaron videoclips n’entornos icónicos d’Asturies, de los que namás participó una banda de música n’asturianu: L-R, col “Agarráu de Tresmonte”. Esti 2022 repítese la iniciativa cola novedá de que l’oxetivu ye promocionar el pasu del Camín de Santiagu per Asturies y, pel momentu, de siete videos publicaos, cuatro son cantares n’asturianu.

D’esta manera ye como pue vese a d’Ún de Grao interpretando “Texeora de Bayo” en Grau; a Silvia Quesada cantando “El Caxón” en La Espina (Salas); a Mapi Quintana y La Maramoniz tocando per Tinéu y Allande’l primer cantar que publica esta formación nueva, “Danza Pin Pin”; y a Eva Tejedor & Les Pandereteres interpretando “Setiembre” en Grandas de Salime. Amás d’estos artistes, tamién tán publicaos videos d’otros grupos que nun canten n’asturianu: Staytons, Pauline en la Playa y Losone.

Asturias Sonora defínese como «una acción cultural na que música, paisaxe y historia enteméncense nun proyectu audiovisual» y planteguen que con esta iniciativa nagüen por «promocionar los enclaves y espacios que percuerre’l Camín Primitivu per tierres asturianes y usar la música y a los nuestros músicos como elementu d’espresión audiovisual».

Mercar discos de los grupos participantes