Viuda versionen “Una de mieu” de Xentiquina

Tres d’asoleyar l’añu pasáu el single “Alleraná“, la banda de punk oscuru Viuda vuelve a publicar un cantar nuevu n’asturianu. Trátase de “Una de mieu“, perconocíu tema de Xentiquina que’l cuartetu femenín convierte nun hit punk de minutu y mediu de duración. Dende’l so sellu discográficu, Humo Internacional, presenten asina esti llanzamientu: «Ye una versión d’una canción de la so infancia, oxirixal del grupu infantil Xentiquina, de la que providencialmente recordaben de memoria tola lletra. Un tema publicáu orixinalmente en 1988, y qu’agora nes sos manes conviértese nuna stravaganza cola que Viuda caltiénnos con vida mientres esperamos pol so deseadísimu discu nuevu». Esta versión ye una amuesa más de lo que Xentiquina trescendió dientro d’Asturies y de l’apuesta cada vez mayor pola llingua asturiana de grupos que nun canten davezu nesti idioma.