Viuda reinterpreta “Baxaben cuatro ayeranos” col so punk escuru
Yá ta en toles plataformes dixitales “Alleraná“, el nuevu single con videoclip de Viuda. El cuartetu femenín de punk escuru con influyencies de la copla presenta esti cantar nel que per primer vegada canten n’asturianu, concretamente na variante dialectal d’Ayer. Musicalmente ye una reinterpretación del clásicu de la tonada “Baxaben cuatro ayeranos” qu’«afonda nel so universu navayeru y demoníacu a la par qu’avanza nes aristes más pop», como presenten dende la so discográfica, la carabayona Humo Internacional.
La banda xixonesa tamién camuda la lletra. Yá nun son los cuatro ayeranos que baxen a comer fabes en madreñes, agora son cuatro ayeranes les que caminen xuntes con navayes, el refaxu arremangáu y les que van semar la llercia ente los homes, recuperando la mística, el conxuru máxicu y los cuentos de les almes penitentes que caleyen pente la nueche. Too ello p’asina afondar na llínia satánica y macabra que caracteriza a Viuda.
El videoclip ta grabáu tamién n’Ayer, ta dirixíu por Samuel Fonseca y Guillermo Kult, producíu por Juanita Zapata y nél les componentes de Viuda visten traxes tradicionales fechos a midida y pa la ocasión por Made By Kös.
