Xune Elipe presenta ‘Hai una llinia trazada’ esti xueves n’Uviéu
La Conseyería de Cultura, Política Llingüística y Turismu ta acabante de presentar ‘Uviéu Abierto‘, una serie d’actos culturales alredor de la llingua y la cultura asturiana que se van facer na Biblioteca Ramón Pérez d’Ayala d’Uviéu. La presentación de ‘Hai una llinia trazada‘, l’ensayu de Xune Elipe dedicáu a la historia de la música asturiana col que ganó’l XXVI Premiu Máximo Fuertes Acevedo, ye la primer d’estes actividaes. Va ser esti xueves 3 a les 18.30h y nella van participar Elipe, l’escritor Adolfo Camilo Díaz y Antón García, Director Xeneral de Política Llingüística.
‘Hai una llinia trazada‘ ye una obra que, a lo llargo de 240 páxines y 25 capítulos, percuerre’l fechu musical asturianu dende los sos anicios hasta la dómina actual, faciendo un repasu pelos periodos, movimientos y intérpretes más importantes, resaltando los datos y fechos que foron cruciales nel devenir de la nuestra música.
Too ello fáise dende un puntu de vista non colonial, considerando a la música asturiana como un ente vivu y autónomu, non supeditáu nin dependiente d’otros procesos. Una historia contada dende dientro de la propia música del país, con un enclín claramente pedagóxico-divulgativu y militante nacional, social y culturalmente. La orixinalidá d’esta obra ye tratar tamién el contestu nel que se desenvolvió la música del país, rellacionándola con otros aspectos como la política, l’arte, la lliteratura o la sociedá. Nella ufiértase una panorámica global y amplia del fechu musical asturianu, convirtiéndose nuna ferramienta afechisca pa comprender y analizar qué representó y representa la nuestra música y sobre qué base se sofita’l so futuru.
‘Hai una llinia trazada’ reflexa que la nuestra identidá musical foi creándose adulces a lo llargo del tiempu, escomenzando a manifestase y adoptando la so forma ente los sieglos XII y XVI. Otra manera, tamién a partir del sieglu XV ye cuando s’afita la conciencia de que los asturianos y asturianes falaben una llingua diferente de los demás pueblos, siendo vistos como una comunidá humana diferenciada cultural y políticamente. Sobre esti raigañu foron incorporándose adulces en momentos posteriores otros elementos (melodíes, ritmos y instrumentos), hasta algamar la espresión definitiva que tien anguaño la música popular/tradicional asturiana.
