Toli Morilla abre los conciertos d’esti mes, con 8 actuaciones de música asturiana
Col mes nuevu aporten nuevos conciertos. Hasta la fecha hai confirmaos 8 conciertos protagonizaos por artistes qu’usen l’asturianu como llingua vehicular o en parte del so repertoriu. La primer d’estes actuaciones ye esti miércoles 3 de febreru nel Paraninfu de Llaboral Ciudá de La Cultura. A les 18.30h y con entrada de baldre, el veteranu cantautor Toli Morilla va ufrir un conciertu didácticu nel mesmu formatu tríu col qu’actuó n’Amosando.
La villa de Xovellanos tamién va acoyer el 10 de febreru, a les 19h y nel CMI d’El Coto, el conciertu de Cerezal, formación folk-pop que s’alcuentra presentando’l so últimu trabayu ‘La Cereza’l Cielu‘. Dientro de la programación d’Asturies Cultura en Rede -el ciclu de conciertos entamaú pol Gobiernu del Principáu d’Asturies- tán axendaes les actuaciones de la cantante Tina Gutiérrez -11 de febreru a les 19h nel Teatru Clarín de Sotu’l Barcu-; Felpeyu -25 de febreru a les 20.30h nel Espaciu Cultural El Liceo de Navia-; y David Varela -26 de febreru a 19h nel Teatru Vital Aza de L.lena-.
Pa rematar l’axenda d’actuaciones confirmaes hasta agora, el CSA L’Apiaderu de Nava entama un eventu de música y poesía nel que van participar les pandereteres feministes Nun Tamos Toes y Ana Lamela, cantautora xixonesa que ta acabante d’asoleyar el so discu nuevu ‘Poética d’Un Carbayu‘.
