Yá ta en YouTube’l videoclip de la versión nueva de “Asturias”

Víctor Manuel, Marisa Valle Roso, Nacho Vegas, Leticia Baselgas, Chus Pedro y Rubén Bada unen les sos voces y instrumentos nuna revisión del himnu “Asturias“, escrito por Pedro Garfias en 1937 y musicáu por Víctor Manuel nos años 70. Esta emocionante versión nueva estrenóse’l pasáu 1 de xineru en TPA dientro de la película-documental Asturias, el viaje de una canción. Agora pue vese y sentise en cualesquier momentu a traviés de YouTube.

Col estrenu d’esti videoclip, la televisión pública asturiana celebró’l so pasu a la emisión en HD, el pasáu llunes 13 de febreru: “En xunu de 2006 TPA entamó les sos emisiones. Pa la puesta en marcha del entós ente públicu fízose una versión especial del cantar “Asturias patria querida“, con una grabación qu’involucró a un grupu de músicos xóvenes y veteranos de la escena pop-rock asturiana. Eses sesiones dieron llugar tamién a un videoclip que sirvió pa inaugurar les emisiones de TPA”, comenten dende la cadena. “Pasaos 18 años y col aniciu de les emisiones en HD, TPA presenta un videoclip de la canción “Asturias” de Víctor Manuel col que celebrar y señalar el cambiu de paradigma tecnolóxicu de les emisiones de la televisión asturiana”.

El cantar naz del documental Asturias, el viaje de una canción de José Braña y Chus Neira. Nél esplórase la xénesis del testu y de la canción y la obra audiovisual acompaña a cinco músicos asturianos nun viaxe a esa Andalucía onde nacieron les pallabres de Garfias pa recrear la composición xunto al propiu Víctor Manuel, al productor xixonés Paco Loco, figura histórica de la escena indie asturiana y española, y a Joaquín Pascual (Surfin’ Bichos). Chus Pedro, Nacho Vegas, Marisa Valle Roso y el dúu L-R formáu por Leticia Baselgas y Rubén Bada protagonicen la cinta, nun amiestu ente road-movie o rockumentary que viaxa al centru de les emociones de la identidá asturiana.

Mercar discos de los protagonistes

Dexa un comentariu

X