Esti mes cumpliéronse 90 años de la Revolución d’Ochobre de 1934 y nun hai añu que n’Asturies nun haiga alcordanza de la que foi la última revolución obrera n’Europa. Ente los estremaos actos que s’entamen, la música siempre tuvo un papel destacáu gracies a los conciertos y festivales qu’organizaron dellos colectivos sociales pa homenaxear estos fechos y esparder el so llegáu pente la mocedá. La izquierda soberanista asturiana foi ún de los movimientos políticos que más puxó nesti sen y tanto Andecha Mocedá como la so heredera, Darréu, organizaron los conciertos/festivales Asturies Nun Escaez/Dïa de la Mocedá Revolucionario (DMR) delles vegaes dende l’añu 2000 hasta’l 2022.
Na so tercer edición -la de 2004, qu’amás foi cola que se presentó públicamente Darréu-, el conciertu Asturies Nun Escaez aportó a la sala Albéniz de Xixón y nella tocaron el grupu navarru Skalariak, los madrilanos Habeas Corpus y, per primer vez, tres bandes de rock n’asturianu de reciente creación d’aquella: una de punk-folk, Skontra; otra ska-punk, Skama la Rede; y otra ska-reggae, La Tarrancha. 20 años dempués son innumerables les vegaes qu’estos grupos compartieron escenariu y anguaño son les úniques formaciones d’esti xéneru que -ensin contar a Dixebra y Los Berrones- caltuvieron la so actividá per más de 10 años ininterrumpíos.
Skontra La Tarrancha, como a vegaes se llama irónicamente a esti tríu de grupos, formen la segunda xeneración de rock astur. Aquella que, siendo heredera de Dixebra, de Los Berrones y d’otres bandes de rock, punk y ska internacionales; nacieron a primeros años de la década del 2000, dalgunes compartieron espaciu nel compilatoriu Rock ‘n’ Llingua (L’Aguañaz, 2004) y ficieron un camín nel qu’editaron dellos trabayos discográficos y tocaron per conciertos y festivales destacaos de dientro y fuera d’Asturies.
Coincidiendo cola efeméride del Asturies Nun Escaez de va venti años -y col DMR de 2014, nel que volvieron a tocar xuntes acompañaes de los míticos Avientu y d’Ochobre, que daben el so primer conciertu-, dende l’AMCA (Archivu de la Música Contemporánea Asturiana) dixitalizamos les sos maquetes. Estes grabaciones caseres amuesen los primeros pasos d’unos Skontra qu’asoleyaron la maqueta en 2003 y daquella yeren el grupu más rodáu; de La Tarrancha qu’en QLT? (2006) facíen un ska-reggae ensin un plizcu de distorsión y con una voz femenina y otra masculina, y de Skama la Rede qu’en Hestories Absurdes (2004) yá apuntaben maneres col so inconfundible ska-punk.
Suscríbite a les nuestres novedaes
