Yá ta disponible en plataformes dixitales «Medio la mar«, el nuevu single del dúu de música electrónica Llevólu’l Sumiciu -Pablo y David Alonso- que va formar parte del so próximu EP, La Llobera. Tres l’adelantu de “Divina” en xunetu, mezclen nesti tema música trap y Jersey Club con una vaqueirada de L.laciana na voz de la intérprete d’asturianada Alicia Villanueva.
Con esti single, Llevólu’l Sumiciu tornen cola so mestura de música tradicional asturiana, electrónica y audiovisuales dempués del so primer EP Entaína (2021) -editáu pol sellu Samain Music- y de la so participación en Semando Son, el compilatoriu de la música moza n’asturianu entamáu por musicasturiana.com. «Medio la mar» ye’l segundu adelantu del so próximu EP La Llobera, un trabayu que va aportar el 27 de payares. Nél faen un homenaxe a Ana María García, llanisca acusada de bruxería y xulgada doblemente nel sieglu XVII: pola inquisición y pola sociedá, que nun aceutaba qu’una muyer quixere ser llibre, tamién no tocante a l’amor.
Suscríbite a les nuestres novedaes
