La Plaza d’Europa de Piedrasblancas va enllenase esti sábadu de baille y música’l país. Dende les 18h va festexase l’eventu Baille Nel Paraísu, un «festival dedicáu a fomentar la cultura asturiana a traviés de la tradición oral«, como comenten dende la organización. Un taller de baille de Santi Galguera; la presentación del proyectu Tocando Raíces del Ecomuséu La Ponte; y les actuaciones de Caparines, Los Gascones y 6 Riales; formen la programación.
«L’enfotu del festival ye fomentar la participación activa de los asistentes, faciendo una convivencia de bailles, dances y cantares» presenta’l Valey Centro Cultural de Castrillón al rodiu d’esti eventu. Pa ello, el musicólogu y director del Grupu Etnográficu L’Oriente Santi Galguera va poner un taller de baille tradicional a les 18h. Llueu, a les 19.30h, va presentase Tocando Raíces del Ecomuséu La Ponte, proyectu qu’entemez la investigación oral, la creación artística esperimental y l’acción comunitaria.
A partir de les ocho la tarde son los conciertos nos que van actuar la formación de música tradicional Caparines (20h), la bandina popular Los Gascones y el cuartetu de percusión tradicional y voz 6 Riales El festival ye de baldre y, en casu de lluvia, va treslladase a la boina del Poliderportivu de Piedrasblancas.
Suscríbite a les nuestres novedaes
