L’Asociación Cultural L’Alborcer Banda de Gaites de Castrillón va celebrar esti sábadu, 27 de xunu, la ventidós edición del Alcuentru de Bandes de Gaites de Castrillón. Nesta ocasión, el festival va cuntar coles actuaciones de la Real Banda de Gaites «Ciudad de Oviedo»; formación gallega Lembranza Solpor, proveniente de Celanova (Ourense) y la Orquestina La Xarangana; amás de l’anfitriona del eventu.
El XXII Alcuentru va dar empiezu a les 19.30 hores col pasacáis de les bandes participantes peles cais de Piedrasblancas, que va rematar na Plaza d’Europa, onde va allugase l’escenariu del festival. Dende la organización del eventu destaquen el la trayectoria de caúna de les formaciones participantes esti añu. De la Real Banda de Gaites “Ciudad de Oviedo” sorrayen que “cunta con más de 50 componentes”, da “130 actuaciones al añu,y que tocó en ciudaes d’América y Asia como Miami (Estaos Xuníos), Veracruz (México) o Hangzhou (China). D’otra banda, presenten a La Xarangana como una formación “qu’entemez la escena de la música tradicional asturiana con una puesta n’escena fresca, dinámica y actual” y de Lembranza Solpor valoren que lleva “47 años dedicada a la difusión y enseñanza de la música y el baille tradicional gallegu”
Les actuaciones na Plaza Europa van empezar a les 20:30 hores y la escritora Esther García, gallardonada cola Flor del Agua 2025, va ser la encargada de conducir l’actu y de presentar a caúna de les formaciones participantes. En casu d’agua, el festival va treslladase a la cubierta del polideportivu municipal, calteniéndose los horarios previstos.
Con esta nueva edición del Alcuentru, la Banda de Gaites de Castrillón vuelve convertir al conceyu en puntu d’alcuentru de la música tradicional, axuntando a agrupaciones d’Asturies y Galicia y averando el folclore a los vecinos.
Suscríbite a les nuestres novedaes
