El próximu miércoles 1 de payares remata la quinta edición d’Amosando, el ciclu de presentaciones de discos de música asturiana, con conciertos en formatu íntimu grabaos y emitíos llueu per Internet. 6 Riales y Antón Menchaca protagonicen el segundu conciertu/grabación nel que van presentar los sos trabayos nuevos: Sutripar (que presenten en directo esti vienres 27 d’ochobre con un conciertu especial nel Nuevu Teatru de La Felguera) y Los díes contaos. Un conciertu nel que va poder sentise música tradicional de voz y percusión y tonada renovada. L’escenariu va volver a ser Les Naves d’El Natahoyo; y namás van tener invitación a ellos la xente asociao a L’Ensame que gane’l concursu pa una pida una de les 7 entraes dobles disponibles. El vienres 27 vamos anunciar el nome de los ganadores.
6 Riales ye un tríu de percusión y voz qu’amesta pieces tradicionales con composiciones propies. Dempués de cinco años pisando escenarios, publiquen agora’l so primer llarga duración Sutripar.
Antón Menchaca ye un dúu formáu por Belén Antón (voz) y Pedro Menchaca (guitarra). La so orixinal propuesta entemez asturiana con soníos contemporáneos, como pue sentise nel so trabayu nuevu Los díes contaos.
Cinco ediciones y 22 artistes
Amosando nació en marzu de 2019 a idea de la plataforma musicasturiana.com. Nesti tiempu tocaron 24 artistes pa presentar les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel, Algaire, Mostru L’Horru, Slum Suit, La Garrapiella y La Bonturné. La suma de los videos de los conciertos algama más de 250.000 reproducciones en YouTube.
Estes actuaciones amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, realizada audiovisualmente por Javi Lueje y Rubén Álvarez y subvencionada pola Fundación Municipal de Cultura y Educación de Gijón/Xixón.
Suscríbite a les nuestres novedaes
