Yá ta en toles plataformes musicales el quintu single que Ferla Megía publica nesti 2023. Esti músicu qu’amesta pop, electrónica, música urbana y folk ta acabante d’asoleyar «Medrana a medrar», un cantar mui personal que musicalmente que fala «del mieu a atrevese a medrar, a camudar de mentalidá o a salir de la zona de confort, como dicen los gurús de l’autoayuda».
«La música ye un beat de trap que fici va meses a partir d’un riff de guitarra acústica», desplica Megía. Amás, nesti tema -que ye mui novedosu dientro de la música que se fai n’asturianu- pue sentise un sampléu del raperu Dheformer Galinier -«un lletrista super profundu qu’encaxaba perbién col sentimientu de la canción»- y otru de la banda American Football al final del cantar. En cuantes a la lletra, esti xoven músicu añade que ye mui murnia, pero que ye «namás un desixencia llírica; una manera de sacar sentimientos p’afuera y quedar más agusto».
Dempués de «Ni bajo el mar» y la so remestura, de «Ramu verde«, de «La vida se gasta / Pastora» y d’esti «Medrana a medrar«, Ferla Megía tien más intención de siguir asoleyando singles: «Tengo unos cuantos sacaos yá del fornu y otru bon puñáu a puntu caramelu; pensé en metélos toos nun álbum pero tovía nun m’atrevo y de toes formes préstame sacalos asina según salen del estudiu», comenta esti artista de 24 años qu’afirma que cada vez ta «más agusto llanzando temes».
Suscríbite a les nuestres novedaes
