L’Alcuentru Folclóricu n’Ayer aporta esti añu a la novena edición y fáilo anovando’l so formatu. Los díes 27, 28 y 29 d’ochobre Morea va ser l’escenariu del FolkAyer, un eventu qu’axunta actuaciones de bandes folk asturianes, bretones y escoceses; alcuentru de bandes de gaites; asturianada; taller de baille, mercáu celta y gastronomía. Too ello dientro d’una carpa asitiada nel Colexu Públicu de Morea, con entrada de baldre y serviciu d’autobuses ente Mieres, Morea y Felechosa tola tarde y nueche.
El vienres 27 a les 17h entama l’eventu cola apertura del Mercáu Celta qu’a lo llargo del fin de selmana va ufrir artesanía, puestos de comida y actividaes pa la reciella. A les 19.30h ye’l taller de baille astur-bretón y a les 21.30h un desfile con antorches que va dir dende’l campu Morea hasta la carpa’l festival. A les 22.30h entamen los conciertos cola formación asturbretona La Banda Latira, y los grupos folk Alienda y Startijenn, éstos últimos llegaos tamién dende Bretaña.
El sábadu 28 ye l’Alcuentru de Bandes de Gaites que va entamar con un pasucais a les 16.30h y va tar siguío a les 18h poles actuaciones de la Banda Gaites Villaviciosa-El Gaitero, la Banda Gaites Castrillón, la Escola de Gaitas de Ortigueira, la Banda Gaites Conceyu Llangréu y la Banda Gaites Escolinos d’El Gumial. A les 22.30h son los conciertos cola participación de la Banda Gaites El Gumial -organizadora del festival xunto col Conceyu d’Ayer-, el grupu de música tradicional asturiana fusionada Algaire y los irlandeses Elephant Sessions.
Tonada, autobuses y La Bonturné
Pa rematar el FolkAyer, l’últimu día va haber una xinta asturiana fecha pola Escuela d’Hostelería d’Ayer y una muestra de tonada a les 18h na que participen los intérpretes Álvaro Fernández , Liliana Castañón y Paula Prieto y el gaiteru Fonsu Les Regueres. Amás d’un ampliu aparcamientu, va haber serviciu d’autobús Mieres-Felechosa-Morea dende la tarde y hasta les 4 la madrugada
Al marxe d’esti eventu, la villa de Morea tamién va acoyer otru conciertu de música asturiana, el de La Bonturné. El cuartetu bal-folk va actuar el sábadu 28 a les 20h nel Cine Carmen de Morea, dientro de la XXVI Muestra de Música «Tocando pelos Pueblos».
Suscríbite a les nuestres novedaes
