Esti sábadu 6 d’agostu celebróse nel Festival Intercélticu de Lorient (Bretaña) la 35 edición del troféu MacCrimmon de gaita, que ta consideráu como’l más prestixosu del mundu celta y nel que compiten gaiteros d’Asturies y Galicia. El gaiteru de Lieres Fernando Vázquez Cárcaba foi’l ganador del troféu nesti 2022, algamando un premiu pol que yá compitiera otres cinco vegaes. D’esta manera, el sierense añade esti troféu a otros que yá tien como los de los concursos de gaita de Villaviciosa, La Nueva y Colunga o’l «Ciudad de Oviedo».
Xunto a Vázquez Cárcaba, tamién representaron a Asturies na competición Jaime Álvarez, qu’algamó’l segundu puestu; Daniel Meré (6ª posición) y Diego Lobo (7ª posición). Los cuatro gaiteros interpretaron con maestría una pieza asturiana, una gallega y una bretona frente a un xuráu formáu por espertos d’estos tres países celtes.
Suscríbite a les nuestres novedaes
