La Casa Riera de Cangues d’Onís va acoyer dende esti sábadu 5 payares una esposición permanente dedicada al míticu gaiteru con material donáu pola so familia. L’actu institucional va ser a les 17:30 hores y, darréu, un pasacáis con media docena de bandes de gaites va percorrer la llocalidá hasta hasta l’edificiu nel que tamién s’asitia la Oficina de Turismu. Ente los participantes a esti homenaxe, figuren les bandes d’Uviéu, Xixón, Corvera, Cangues d’Onís, Cabrales y Onís, pero tamién van tar presentes interpretes como Alberto Varillas, José Manuel Tejada, Óscar Fernández y Fernando Vázquez Cárcaba. Los actos van siguir esa mesma tarde cola inauguración de la esposición a les 18:30 hores, pa depués facer otru pasacáis hasta la plaza Camila Beceña, na que va entamase un conciertu.
José Remis Ovalle escomenzó con ocho años a tocar el tambor con so pá, el popular José Remis Vega, conocíu como «El gaiteru de Margolles» (llugar del conceyu de Cangues), que fundare una escuela de gaiteros y foi escoyíu pola Casa Real como gaiteru oficial d’Alfonso XIII. Con doce, Remis Ovalle inicióse na gaita asturiana y en 1957, un añu después d’algamar el títulu de Gaiteru Mayor d’Asturies, embarcó rumbo a Buenos Aires pa facer una xira que lu llevaría per tol continente americanu y que duraría tres años. Nesi periodu diba grabar el primer discu, con pieces como «Xiringüelu», «Panderetera» o «Jota Asturiana», volviendo a Asturies nel añu 1960. Ye entós cuando principia a componer cantares pa La Pastorina, llogrando un éxitu descomanáu, acompañándola tamién en directo cola gaita y el vigulín. Una de les últimes oportunidaes de velu tocar foi el 4 de xunu de 1986 nel Teatru Colón, por cuenta del pregón de les fiestes cangueses. Tres díes más tarde diba tocar per última vez la gaita nel programa Campanadas de Asturias de RNE, yá que poco depués diba finar nel pueblu cangués de Tornín, a los 77 años.
Amás d’esta esposición permanente, el Conceyu de Cangues d’Onís -nel que yá tien una cai na so alcordanza- quier entamar un homenxe añal a quien ye consideráu ún de los gaiteros fundamentales de la historia musical d’Asturies, que marcó y influyó decisivamente a varies xeneraciones d’intérpretes.
Suscríbite a les nuestres novedaes
