Misiva entren a grabar ‘Mala Relixón’, un nuevu EP formáu por cuatro temes

Misiva nun dan tregua. La banda punk-rock moscona ta acabante d’entrar nel OVNI Estudio de Bonielles a grabar lo que va ser el so EP nuevu, Mala Relixón. Con Pablo Martínez (Desakato) a los mandos, como vien siendo vezu nos sos últimos trabayos, el grupu va grabar cuatro cantares más un videoclip nos que lleven trabayando dende l’andanciu. «Van ser cuatro cañonazos que siguen el camín un poco más rockeru de L’Últimu Aliendu y de La Misiva, anque ensin perder la esencia de lo que llevamos faciendo dende va más de doce años», comenta Humberto Sierra, vocalista del grupu.

«Fartos de tanta escuridá, de tantes males noticies y de tantes pérdides que llevamos viviendo dende va dos años, queremos alzar la voz pa dicir que nun podemos dexanos llevar por toda esa inercia negativa. Que siguimos más vivos que nunca y que tócanos a nós romper con esa “Mala Relixón” que nos inoculen dende les redes sociales y dende los medios y que nos tien alloriaos ensin dexanos ver la viesca qu’hai tres de los árboles». añade’l cantante sobre la filosofía presente nesti trabayu y que resume como «un aire nuevo que da acabación a aquella etapa más escura de la banda».

Amás, Sierra define l’estilu d’estes nueves canciones como «los Misiva de siempre pero menos previsibles que nunca» y sorraya la «madurez» y la «llibertá creativa» que van dar forma a Mala Relixón. Enantes qu’acabe l’añu, el grupu moscón va regresar cola que va ser la so octava referencia en doce años, lo qu’amuesa la constancia y vitalidá d’esta banda que tien un estilu únicu dientro de la escena n’asturianu.

12 años de punk-rock

Misiva ye una de les bandes más renomaes de la escena punk-rock d’Asturies. La so trayectoria principió en Grau en 2010 y ta marcada por facer un punk-rock rápidu y melódicu, influyíu por nomes de la escena californiana como Bad Religion o Rancid. Anque los sos trés primeros discos tán en dos versiones -una toa n’asturianu y otra toa en castellanu-, dende’l cuartu trabayu yá namás asoleyó la versión n’asturianu, llingua na qu’interpreten tamién tol so repertoriu en directo y que sonó en festivales tan prestixosos como’l Resurrection Fest o’l Tsunami Xixón.

Comprar discos de Misiva na tienda online