Ocho conciertos y un cantar nuevu pa festexar San Xuan

Esti vienres 23 de xunu ye la nueche de San Xuan y les fogueres van prendese per tol país. Anque cada añu la música de raigañu va perdiendo pesu frente a actuaciones d’orquestes y DJs nes programaciones pa festexar esti día, tovía queden fogueres nes que baillar al son de los ritmos autóctonos. Esti 2023 actúen a lo llargo de los díes 23 y 24 delles agrupaciones folclóriques; Felpeyu en Corvera; La Tarrancha y Ilustres Patilludos en L’Entregu; Calea en Llugones, Chus Pedro y Pipo Prendes en Llaviana; Xaime Arias Trío en Mieres; Dixebra en Caravia y Skama la Rede en Carreño. Amás Odón del Paganéu asoleya esa medianueche’l single «Larga y Complicada».

Los primeros n’actuar van ser Calea; el tríu de música tradicional formáu por Leticia Baselgas, Silvia Quesada y Rubén Bada va calecer la tarde de San Xuan con un conciertu nel Centru Polivalente de Llugones. En La Pola (Llaviana), Chus Pedro y Pipo Prendes van interpretar los sos cantares dedicaos a la mina y a la mar n’El Kiosko de l’Avenida a les 20h. En Mieres, les agrupaciones L’Artusu, Ruxidera, Prau Llerón y la Banda Gaites Villa de Mieres van actuar per delles places de la villa mientres que Xaime Arias Trío va presentar el so discu últimu, La mio neña, a les 21h na cai Jerónimo Ibrán.

Uviéu y Xixón van festexar la fecha a ritmu de bandes de gaites y canción asturiana. Na capital va haber un recital de canción asturiana nel Campillín y les bandes de gaites Vetusta, Xácara y del Centro Asturiano van actuar peles cais del Uviéu Antiguu ente les 20h y les 22h. En Xixón, van pasar pel escenariu asitiáu na playa d’El Natahoyo la banda gaites La Magüeta a les 21h, la de Xovellanos a les 21.30h, Conceyu de Xixón a les 22.15h, a les 22.45h Noega y y a les 23.15h Villa de Xixón.

Felpeyu y rock n’asturianu

En La Foguera d’Asturies, que ye como se conoz a la foguera de Corvera, declarada Fiesta d’Interés Turísticu asturianu y que cada añu se celebra nel embalse de Tresona, va tocar Felpeyu a les 22.30h y a les 00.20h Blues Probes, formación que tien cantares n’amestáu. Per otru llau, el CSA La Semiente y el festival Que Nun Apare, autoxestionen la foguera de San Xuan en L’Entregu frente al desinterés pola cultura per parte de la corporación municipal. Esti añu entamen a les 20.45h L’Escurecer en Danza, actividá na que va haber música y baille tradicional de forma participativa. A les 22.40 ye la hora del rock n’asturianu colos conciertos d’Ilustres Patilludos y La Tarrancha.

Tamién el rock va tar bien presente’l sábadu 24 na Foguera de Caravia, que vuelve a facese na Playa la Espasa y na que va tocar Dixebra a les 00:30h. Esti mesmu día, yá fuera del marcu de la foguera pero dientro de les festividaes de San Xuan, Skama la Rede actúen a les 23h nes fiestes d’El Regueral de Carreño.

Cantar d’Odón del Paganéu

Coincidiendo cola nueche de San Xuan tamién asoleya música nueva. Odón del Paganéu ta preparando’l so próximu trabayu Tonaes ad hoc, del que va dir asoleyando cantares pasín a pasu. La primera de les pieces que va presentar ye «Larga y complicada», una tonada na que lu acompaña a la gaita Fonsu el de Les Regueres y que se grabó nos estudios La Nozal de Fernando Malva.