Per segundu añu consecutivu Xixón va acoyer Música Peatonal, un ciclu de conciertos entamaos n’espacios públicos pa festexar la Fiesta Internacional de la Música que se celebra güei, 21 de xunu, en más de 120 estaos de tol mundu. La Fundación Municipal de Cultura entama esti ciclu que nagua por «enllenar les cais, places y parques de Xixón de música en directo: soul, jazz, clásica, coral, pop, rock… tolos estilos musicales recoyíos p’amosar la creatividá d’artistes llocales y permitir el disfrute de la música al aire llibre». Dientro de la programación hai dos conciertos nos que tán presentes los soníos de raigañu: Ochobre y Deira.
Deira toquen na cai Tomás y Valiente esti miércoles 21 a les 19.30h. Ye un tríu folk formáu pol xixonés Gonzalo Llao (bouzouki) y los andaluces Juan Almaraz (flauta) y Salvador Daza (vigulín). Apocayá asoleyaron so primer discu: Alba, que presentaron nel prestixosu festival Celtic Connections de Glasgow. El CD ufre, según el grupu «un soníu modernu a traviés de composiciones propies na so mayoría, anque teniendo siempre presente’l folk asturianu y escocés».
Per otru llau, Ochobre van enllenar de punk-rock el Parque de Contrueces. A les 19h del vienres 30 de xunu la formación va descargar el so repertoriu formáu por cantares punk-folk, rock y ska; lletres combatives y influencies de clásicos de la escena como Dixebra, Skama la Rede, Skontra o Avientu. Toles actuaciones son de baldre y yá pue consultase la programación completa na web del Ayuntamientu.
Suscríbite a les nuestres novedaes
