El Festival Intercélticu d’Avilés y Comarca aporta esti sábadu a la so 26 edición. Esposición, mercáu celta, talleres, atracciones pa la reciella, pasucais, recreación histórica, gastronomía, llucha celta, baille, desfiles y conciertos, dan forma a una programación mui bayurosa que va convertir a Avilés na capital celta d’Asturies a lo llargo d’ocho díes. La zona conocida como La Esposición (Les Meanes) va acoyer la mayoría de les actividaes; sicasí, l’Intercélticu aporta tamién a otros conceyos de la contorna, con actividaes en Pravia y en Corvera. En total, va haber más de 20 actuaciones musicales de formaciones asturianes, gallegues, bretones, escoses y mallorquines.
Una Nueche en Danza cola participación de la Bandina Turcipié, les Pandereteres de Fitoria y la pareya de gaita y tambor Dani y Giuseppe abre la programación musical el sábadu 22 a les 22h. El domingu 23 actúen el grupu de baille tradicional y la banda de gaites Esbardu -organizadora del eventu-, que va facer pasacais y amueses tolos díes del festival. Delles recreaciones históriques, llucha celta y danza protagonicen la programación d’esi día que va zarrase con un conciertu de Loína a les 22.15h.
El llunes 24 pela tarde ye l’Alcuentru y l’Amuesa de Bandes de Gaites cola participación de la BG El Gumial, la BG Ciudad de Cangas de Onís y Gaiteros del Carbón. A les 22.15h toquen el dúu bretón Nicosyz & Zenkool. El martes 25 aporten dos formaciones escoceses que van tar presentes na programación de los demás díes: la Maybole Pipe Band y la JDW Highland Dancers. El baille tradicional protagoniza esta xornada, col Alcuentru y Amuesa de Grupos de Baille Tradicional na que participen L’Artusu, Blimea y Ximielga la Saya. A les 22.15h, l’actuación de la bandina La Garrapiella zarra l’actividá d’esi día.
El miércoles 26, amás de la esposición, pasucais y espacios de restauración y pa la reciella que tán presentes tol festival, tamién van tocar a les 22.15h, Tarran, moza formación folk escocesa; mentes que’l xueves 27 va ser la Nueche Máxica Lluna Celta, na que participen la formación gallega Banda Gaitas Xarabal, la bretona Kerlenn Pondi, y les escoceses y asturianes yá mentaes. Toes estes formaciones van actuar los siguientes díes del Intercélticu.
Felpeyu y Los Berrones
Pal vienres 28 y sábadu 29 el FIA echa la traca final. Pasucais y desfiles de les formaciones foriates y asturianes van tar mui presentes na programación, que tamién aporta a Pravia‘l día 28 y a Corvera‘l día 29. El vienres a les 22.15h actúen Felpeyu nel escenariu principal y llueu va haber una Nueche Escocesa. Per otru llau el sábadu son Los Berrones los cabeza de cartelu con un conciertu a les 22.15, que va tar precedíu pola actuación de la formación mallorquina S’Estol Porrerenc y siguíu por un Fest-Noz bretón. Más desfiles, recreaciones históriques y una Andecha Intercéltica con toles formaciones folclóriques participantes, ponen el ramu a esti eventu veteranu que ta distinguíu como Fiesta d’Interés Turísticu.
Suscríbite a les nuestres novedaes
