Calea, La Bonturné, Héctor Braga y Caldo y Os Rabizos toquen esti fin de selmana n’Uviéu

Uviéu acueye del vienres 14 al domingu 16 l’eventu Alfonso II El Primer Peregrino. Son unes xornaes dedicaes a esti rei asturianu qu’axunten gastronomía, talleres, actividaes familiares y música. Dientro de la programación, la música n’asturianu y gallego-asturiano tien bien de protagonismu gracies a les actuaciones gratuites de Calea, La Bonturné, Héctor Braga y Caldo y Os Rabizos a lo llargo’l fin de selmana

La Plaza’l Paragües va ser l’espaciu nel que se celebren la mayoría los conciertos. El vienres 14 a les 13h actúen Calea, el tríu de música tradicional formáu por Silvia Quesada, Leticia Baselgas y Rubén Bada. A la nueche, de 23h a 00h actúen La Bonturné, la formación bal-folk integrada por David Varela, Merce Santos, Santi Caleya y David Casillas qu’apocayá asoleyó’l so primer discu A Contraforga.

Héctor Braga protagoniza dos conciertos: ún el sábadu 15, a les 20h, na Plaza’l Paragües. Nél va interpretar l’espectáculu Cantares de Ciego. Al día siguiente, nel Parque d’Iviernu va facese la Romería Alfonsina y nella va actuar a les 13h Braga col recital Memoria Folk y Caldo y Os Rabizos a les 18h cola so música tradicional del Eo-Navia. Un fin de selmana enllenu de música’l país pa facer alcordanza del monarca que descubrió la tumba del Apóstol Santiago, naciendo asina’l Camín de Santiago.