La industria musical d’Asturies tien una nueva cita: Música en Rede. Alcuentru profesional. La Conseyería de Cultura, Política Llingüística y Deporte, a traviés de Cultura en Rede, entama estes xornaes profesionales que van incluyir alcuentros comerciales (Xuntes), conferencies y meses de redondes (Conxustes), presentaciones curties de proyectos (Rolda), talleres técnicos (Erbíes), un puntu d’asesoramientu (En Rede) y showcases (Llabor), Too ello va ser en Llaboral Ciudá de la Cultura ente’l 16 y 18 d’abril alcuentru y yá ta abiertu’l plazu d’inscripción de propuestes musicales pa los showcases.
«Visibilizar el talentu de los artistes asturianos y crear sinerxes y espacios de debate ente profesionales del sector» ye ún de los oxetivos cimeros d’esti alcuentru. Tamién busca «plantegar nueves dinámiques nel ecosistema musical qu’afonden na profesionalización», y pa ello una de les iniciatives más destacaes del programa son los showcases. Hai previstes doce actuaciones -seis de formatu pequeñu nel Paraninfu de la Llaboral y otres seis de formatu medianu o grande nel Teatru de la Llaboral- con una duración máxima de 40 minutos. Les actuaciones van tar remuneraes con una cifra d’ente 500 €y 2.000 € -más otros 250 € por técnicu- y van tar dotaes de la infraestructura técnica necesaria.
Güei ábrese’l periodu d’inscripción pa participar nestos showcases y les solicitúes van poder presentase hasta’l 29 de febreru a les 12 hores al traviés de http://panel.asturiesculturaenrede.es. Los detalles de la convocatoria tán disponibles na web d’Asturies Cultura en Rede, onde tán disponible les bases cola información al completu. Nelles detállense toles condiciones económiques y técniquees y dase la información sobre’l procesu de valoración de les propuestes recibíes, nel que destaca que van priorizase los proyectos que tengan un llanzamientu nuevu y/o compuestu en 2022 o 2023, que tengan temes de creación propia y los compuestos n’asturianu o eonaviegu. Pa participar nes demás actividaes, los profesionales interesaos han formalizar la solicitú a partir del 15 de marzu al traviés del formulariu que va tar disponible na web d’Asturies, Cultura en Rede.
Suscríbite a les nuestres novedaes
