L’Infiestu acueye’l 17 de febreru, una vegada más, l’Antroxu en Danza. Depués de tres ediciones consecutives, LaKadarma, La Benéfica, Les Ablanes y l’Asociación Vecinal Ríu Fontoria vuelven a entamar esta xuntanza con cultura, baille y música del país. La Plaza Mª Xosefa Canellada va acoyer toles actividaes, nes que va haber talleres, una charra, fabada popular, desfile de cabezudos y xigantes y la nueche en danza.
A les 10.30h de la mañana arranca la programación col Taller de mázcares pa la reciella, nel que pueden participar tolos rapacinos y rapacines mayores de cinco años. Pa les doce’l mediudía’l vermú va ser cola charra La mázcara: significáu, tradición y construcción identitaria, nel que van intervenir Xosé Antón Ambás en representación de los Aguilandeiros de San Xuan, Pablo Canal de Sidros y Comedies, María Lorente y Sergio Suárez de L’Entierru de Salmón qu’entamen Selleros. A les dos ye’l momentu de la xinta cola Fabada Popular que va haber na plaza.
Los actos de pela tarde entamen a les cuatro col Desfile d’Antroxu nel que los xigantes y cabezudos van percorrer les cais de la capital piloñesa. Llueu, a les 18h, Santi Galguera va dar un Taller de baille tradicional pa calentar l’ambiente con vistes a la Nueche en Danza qu’arranca a les ocho la tarde. Toles actividaes son de baldre y tienen el sofitu del Conceyu de Piloña
MIRA’L VÍDEU DE LA EDICIÓN DE 2022
Suscríbite a les nuestres novedaes
