Otru añu más aporta a la Pinacoteca de La Felguera el FICAL (Festival Internacional de la Cerveza Artesano de Llangréu), una cita imprescindible con esta bebida y cola música en directo. Na programación d’esti añu la organización vuelve cuntar cola música n’asturianu y, d’ente los más de diez conciertos qu’hai, dos tán protagonizaos por bandes de rock na llingua’l país: Misiva y Los Berrones.
El conciertu de Misiva va ser bien especial porque va ser una de les sos últimes actuaciones, dempués de que va unes selmanes anunciaren que dexen los escenarios. La banda moscona va tocar a la 01.30 de la nueche del vienres 12 nun espectáculu nel que van repasar los sos himnos punk-rock. Per otru llau, Los Berrones toquen esi mesmu día a les doce la medianueche, poniendo enriba les tables 37 años de rock rural n’asturianu.
Amás d’estes actuaciones de música n’asturianu, hai otros ocho conciertos de grupos de dientro y fuera d’Asturies, pinchaes de DJs, actividaes pa la reciella, charres y una entrega premios. Esti añu’l pregón va dalo Enar Areces, responsable de Puru Remangu, marca que forma parte de Mecigaya Creativa SL, empresa que tamién alministra Musicasturiana.com.
Suscríbite a les nuestres novedaes
