El próximu sábabu 1 de xunu arranca la sesta edición d’Amosando, el ciclu de presentaciones de discos de música asturiana, con conciertos en formatu íntimu grabaos y emitíos llueu per Internet. Mapi Quintana y Melandru protagonicen el primer conciertu/grabación nel que van presentar los sos trabayos asoleyaos apocayá: La Maramoniz y II, dos discos nos que destaca la incorporación de soníos de vanguardia, novedosos dientro de la música asturiana.. L’escenariu va volver a ser Les Naves d’El Natahoyo; y namás van tener invitación a ellos la xente asociao a L’Ensame que pida per corréu electrónicu una de les 5 entraes dobles disponibles.
Melandru ye una xoven banda de post-rock única dientro de la escena del rock fechu en llingua asturiana. Tres debutar en 2018, presenten agora II, un EP con un soníu menos escuru y con influencies de la música electrónica.
La Maramoniz ye’l grupu nuevu de Mapi Quintana, una de les artistes más pernomaes de la escena jazz y folk d’Asturies. Nel so primer álbum homónimu entemez la tradición con estétiques y soníos más vanguardistes.
Cinco ediciones y 26 artistes
Amosando nació en marzu de 2019 a idea de la plataforma musicasturiana.com. Nesti tiempu tocaron 26 artistes pa presentar les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel, Algaire, Mostru L’Horru, Slum Suit, La Garrapiella, La Bonturné, Antón Menchaca y 6 Riales. La suma de los videos de los conciertos algama más de 360.000 reproducciones en YouTube.
Estes actuaciones amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, realizada audiovisualmente por Javi Lueje y Rubén Álvarez y subvencionada pola Conseyería de Cultura, Política Llingüística y Deporte del Principáu d’Asturies..
Suscríbite a les nuestres novedaes
