Si a finales d’abril les voces de Xentiquina volvíen a sonar gracies al llibru-discu Canciones pa la Xentiquina. Una selección sentimental de Nacho Fonseca, esti sábadu 25 de mayu los sos cantares van volver a poder sentise en directo. Una banda formada pa la ocasión por David Varela, Cristina Montull, David Casillas y Alicia Álvarez, y el coru escolar del C.P. Cabueñes –dirixíu por Laura Peláez Méndez y formáu por venti escolinos y escolines-, van actuar a les doce la mañana nel Antiguu Institutu de Xixón. Esti conciertu-homenaxe a Nacho Fonseca ta entamáu pola Oficina de Normalización Llingüistica de Xixón, dientro de los actos de celebración del so venti aniversariu,
Nesta cita van repasase dellos de los cantares más emblemáticos que compuso Nacho Fonseca, pioneru y precursor de la música asturiana y de la tresmisión de la llingua asturiana dende que na década de 1980 fora l’impulsor, siendo maestru d’escuela, de los proyectos musicales y educativos de Seliquín y Xentiquina. Anguaño, esti autor referencial coordina’l programa de la Fundación Municipal de Cultura de Xixón “Cantar presta muncho” qu’esti 2024 algama la so undécima edición.
Con esti conciertu homenaxe náguase por que los cantares de Fonseca que marcaron a delles xeneraciones de neños y neñes asturianes vuelvan a actualizase y reinterpretase llegando a audiencies nueves pa que la llingua asturiana se caltenga y s’esparda. Nel eventu tamién va haber una pequeña charra previa col ex responsable de Xentiquina conducía pola editora del llibru, la periodista y música Alicia Álvarez y, tres l’actuación, Nacho Fonseca va firmar exemplares del llibru-discu,
Un éxitu de ventes
Canciones pa la Xentiquina ta siendo ún de los trabayos más vendíos de la temporada. La Fabriquina edita esta obra qu’axunta diez de los temes más conocíos de Xentiquina y Seliquín y que formen la banda sonora de la infancia de delles xeneraciones n’Asturies. La música ta acompañada poles ilustraciones de l’artista Laura Bitxo y por dellos testos alredor d’esti proyectu pioneru nel ámbitu de la educación y de la música.
Suscríbite a les nuestres novedaes
