Na segunda metada de los años 90 taba produciéndose n’Asturies una anovación del panorama folk, con una folada nueva de bandes qu’introducíen la electricidá como un elementu más de la so propuesta sonora. Surden asina formaciones como N’Arba, Folkgando, La Cigua, Brenga Astur, Batulax, La Col.lá Propinde o Cave Canem, que tienen como característica principal l’emplegu del baxu y la batería como sección rítmica, amás de la guitarra eléctrica davezu o ocasionalmente. Ente toes elles -caúna col so propiu estilu- desarrollen una escena orixinal a la que perbién podría denominase como folk-rock astur.
Una de les bandes qu’apaecen naquel momentu foi Miériners, dexando claro yá nel nome d’au proveníen. La bayura d’influyencies qu’acoyíen nel so senu foi la marca principal, incorporando a la so música pasaxes folkis, trad, rockeros, pop o progresivos, con arreglos desinhibíos dafechu y un soníu desprexuiciáu. Miériners foron l’antecedente d’una formación con muncha más proyección y consistencia: Skanda, de fechu bona parte del repertoriu de los pimeros pasó a integrar el d’estos últimos.
El documentu que presentamos ye una grabación fecha’l 11 d’abril del añu 1997, nel conciertu qu’ufiertaron nel festival Folixa na Primavera de Mieres. A mou de presentación pública y mediática, repartieron una casete con él na que rescampla’l bon soníu y execución de les pieces incluyíes.
Suscríbite a les nuestres novedaes
