Estos díes anunciáronse nueves convocatories de programes, residencies y ayudes que pueden beneficiar al sector musical asturianu. Per un llau tán les subvenciones de la Conseyería de Cultura, Política Llingüística y Turismu pal Desendolcu de proyectos culturales y acciones de formación y movilidá per parte de profesionales y empreses, de les qu’hai una llinia destinada a la música. Asturies tamién convoca’l Programa de Residencies del Centru de Recursos Escénicos de Llaboral, Ciudá de la Cultura, na qu’encaxen propuestes musicales siempre que tengan tamién un componente escénicu. Per último, Acción Cultural Española abrió una convocatoria nueva del programa MusaE: Música en los Museos Estatales.
La Conseyería de Cultura, Política Llingüística y Turismu publicó’l 24 de mayu nel BOPA la convocatoria de subvenciones pal Desendolcu de proyectos culturales y acciones de formación y movilidá per parte de profesionales y empresas. Tien una dotación presupuestaria de 550.000 euros y siete llínies d’actuación: artes escéniques, llibru, audiovisual, música, artes visuales, videoxuegos y formación y profesionalización. La partida pal sector de la música ye de 115.000 euros y a esta pueden presentase proyectos de tres tipos: pa la producción d’una obra musical; pa la realización de xires; y pa la organización de festivales y ciclos de música.
El 21 de xunu remata’l plazu pa que les empreses y profesionales puedan presentar proyectos desendolcaos o por desendolcar hasta’l 31 d’ochobre de 2024. Dientro de los criterios de valoración tiénense en cuenta aspectos como’l «interés artísticu, calidá y calter innovador del proyectu» (40 puntos), la «presencia de profesionales del Principáu d’Asturies» (10 puntos), o que más del 50% del proyectu seya n’asturianu o eonaviego (5 puntos). Tamién se valoren pa cada tipu de proyectos aspectos concretos como la trayectoria profesional, el númberu d’actuaciones, la perspectiva de xéneru o’l númberu de díes y artistes implicaos nos eventos. Tola información ta nesti enllaz.
Residencia en Llaboral
Per otru llau, Llaboral Ciudá de la Cultura abrió una nueva convocatoria pa poder participar, ente xunetu y avientu de 2024, nel so programa de Residencies del Centru de Recursos Escénicos del Principáu d’Asturies. Esti programa ta dirixíu a proyectos escénicos, teniendo tamién cabida dellos proyectos musicales que vayan acompañaos d’una propuesta escénica. El 17 de xunu a les 23:59 remata’l plazu pa presentar proyectos a estes residencies que dende 2015 impulsen la creación y investigación escénica, aportando recursos económicos, materiales y humanos del Teatru de la Llaboral pa la concepción, creación y puesta en escena de les obres.
Como indiquen les bases del programa, van concedese un máximu seis residencies, con ayudes ente los 1.000 y los 4.000 euros, y con una duración máxima de cuatro selmanes. Nesti tiempu, pue disponese durante 21 díes de sales d’ensayu y ente 3 y 5 díes del espaciu escénicu del Teatru de La Llaboral. Les compañíes qu’accedan van cuntar tamién con un responsable técnicu del equipu del teatru, pa les tarees que se precisen, durante 110 hores, y con 30 hores de personal auxiliar pa carga, descarga y montaxe de material.
A la hora de valorar los proyectos, va tenese en cuenta la proyección territorial, la calidá y el valor artísticu de la propuesta, asina como la viabilidá técnica en relación a los medios disponibles y van puntuase adicionalmente a los proyectos que fomenten la igualdá, la diversidá y la difusión del asturianu y el gallego-asturianu. Les bases de la convocatoria -na que pueden participar tamién proyectos musicales siempre que tengan un componente escénicu xunto al musical– y la información detallada pueden consultase na web laboralciudadelacultura.com.
Música en los Museos Estatales
Por último, ACE (Acción Cultural Española) xunto a la Dirección General de Patrimonio Cultural y Bellas Artes del Ministeriu de Cultura tán acabante d’abrir el plazu pa la recepción de propuestes pa la temporada 2024/2025 del programa MusaE: Música en los Museos Estatales. Como recueye nel formulariu, hasta’l 17 de xunu pueden presentase grupos y solites de cualesquier estilu musical siempre que los sos componentes nun tengan cumplíos los 36 años a día 31 de marzu de 2025 y que les bandes tengan como máximo cuatro integrantes. Amás, cada participante va poder mandar hasta tres propuestes musicales qu’han amosar una conexón significativa colos conteníos del muséu escoyíu, asina como coles esposiciones temporales o conmemoraciones indicaes nel formulariu de solicitúes.
La programación del Proyecto MusaE 2024/2025 va durar ente’l 16 de setiembre de 2024 y el 31 de marzu de 2025. Los 16 museos de titularidá estatal participantes son Museo Arqueológico Nacional, Museo Nacional de Antropología, Museo Nacional de Artes Decorativas, Museo del Traje, Museo Cerralbo, Museo Nacional del Romanticismo, Museo Sorolla y Museo de América, en Madrid; Museo Nacional y Centro de Investigación de Altamira (Santillana del Mar), Museo Nacional de Arte Romano (Mérida), Museo Nacional de Arqueología Subacuática. ARQVA (Cartagena), Museo Nacional de Cerámica y Artes Suntuarias “González Martí” (Valencia); Museo del Greco y Museo Sefardí, en Toledo; y Museo Nacional de Escultura y Museo Casa de Cervantes, en Valladolid.
Los participantes van recibir una remuneración de 500 euros -300 € por actuación y 200 € como bolsa de viaxe- y el formatu inclúi dos tipos d’intervención musical: conciertu estándar y micro-conciertos, con pequeñes intervenciones d’unos 10 minutos de duración que se suceden a lo llargo’l día nes distintes sales del muséu.
Suscríbite a les nuestres novedaes
