L’axenda vien enllena pa esti vienres, sábadu y domingu con dellos conciertos, festivales y charres nos que los sones de raigañu van tener una presencia destacada. Picarós, Pandereteros d’Anguaño, La Bonturné, 6 Riales, Baxel, Mapi Quintana, Melandru, Rubén Bada y Pepín de Muñalén, José Manuel Tejedor y Anabel Santiago, son los artistes que van tocar d’oriente a occidente del país. Amás, va representase l’espectáculu 13 Reyes de la Banda Gaites la Laguna del Torollu y l’Ateneo Musical de Mieres, ye’l XIII Festival Ruxidera y va haber una presentación del llibru El Celtismu Musical Asturianu.
La programación entama esti vienres 31 en Salas col conciertu del tríu de folk celta Picarós -que tán acabante de ser escoyíos pa tocar nel Festival Intercélticu d’Ortigueira dientro del concursu Runas-. Van tocar en Casazorrina, na Figal de Xugabolos a les 19.30h. Pa les 20h Pandereteros d’Anguaño actúen na Plaza Les Candases de Candás dientro de les Xornaes Lliteraries qu’entama’l Conceyu y l’Asociación de Escritores de Asturias. A la nueche La Bonturné van llevar el so bal-folk a La Taberna El Cuévano de La Pola (Siero); mentes que 6 Riales toquen a les 22h en La Peruyanza, eventu en Les Arriondes nel que tamién hai un taller de baille a les 19h y espicha a les 20h.
El sábadu 1 de xunu al mediudía hai tres cites estremaes: a les doce en Xixón ye la grabación d’Amosando con Mapi Quintana y Melandru; a esa mesma hora en la Casa la Cultura de L’Infiestu preséntase’l llibru El Celtismu Musical Asturianu cola participación d’Ignaciu Llope, Xune Elipe, Lisardo Lombardía Rodrigo Joglar y Esteban Corteguera; y en Nava arranca’l D’Sidres Folk Festival. Nesti últimu eventu la Banda Gaites La Laguna del Torollu y l’Ateneo Musical de Mieres van representar la obra 13 Reyes a les 12.30h y, a les 18.30h, toca’l dúu folk Baxel. Too ello na Plaza Manuel Uría. Tamién nel Oriente va ser el conciertu de Rubén Bada y Pepín de Muñalén, que toquen a les 19.30h nel Teatru Riera de Villaviciosa. La xornada del sábadu complétase col XIII Festival Ruxidera nel Auditoriu Teodoro Cuesta de Mieres nel que participen les agrupaciones folclóriques Les Ayalgues d’Ayer (Cabanaquinta), Grupu de Baille Ruxidera (Mieres) y Asociación de Folclore Entre Ríos (Ávila)
José Manuel Tejedor y Anabel Santiago
La música asturiana sigui sonando’l domingu 2 con conciertos de dos de los artistes más pernomaos del país. Per un llau José Manuel Tejedor actúa en formatu tríu en Cuaña a les 14h, na Biblioteca Gonzalo Anes d’Ortigueira, mentes qu’Anabel Santiago toca en cuartetu nel Teatru Vital Aza de La Pola (L.lena) a les 19h. Toles actuaciones qu’hai esti fin de semana tienen entrada gratuita y hai más información na axenda de musicasturiana.com
Suscríbite a les nuestres novedaes
