El Conceyu de la Gaita ta a piques de cumplir un añu d’existencia y sigue entamando más actividaes. La próxima va ser esti domingu 9 de xunu, a les doce la mañana, na Casa de Cultura de Noreña y lleva por nome I Alcuentru d’Instrumentos de Caña. Trátase d’una serie de cinco ponencies sobre les característiques del material de la caña -l’Arundo Donax- y el comportamientu y axuste de la mesma nos instrumentos.
Los ponentes y temátiques van ser les siguientes: Pelayo Fernandez, profesor titular de la Universidá d’Uviéu va falar sobre les característiques del material y la so influencia nel funcionamientu; Miguel Ángel Fernández, Profesor xubiláu d’Acústica y Organoloxía del Conservatoriu Superior de Música del Principáu d’Asturies va tratar sobre’l funcionamientu y comportamientu de les cañes; Juan A. Ferriol y John Falcone, respectivamente primer oboe y primer fagot de la Orquesta Sinfónica del Principáu d’Asturies, van desplicar el funcionamientu y axuste de les cañes nos sos respectivos instrumentos. Chus Solis, gaiteru y fabricante de gaites en Etimta S.L., va falar de la payuela, la caña de la gaita. Les intervenciones van ser de 15 minutos de duración y va empobinales Luis Pola, Doctor en Musicoloxía y representante del Conceyu de la Gaita como miembru de la so Xunta Directiva.
«Seya un músicu estudiante o profesional, oboísta, fagotista o gaiteru, tola so vida musical va xirar alredor d’un elementu común, sicasí menudín, pequeñu, pero d’importancia abondo y de cuidáu imprescindible, ensin el qu’estos intrumentos nun podríen producir el so soníu: ye l’alma de caún d’ellos, trátase de la caña. La caña apurre al instrumentu toles posibilidaes que puede ufiertar, un material vivu, dacuando, con un comportamientu “misteriosu” qu’anguaño sigue siendo motivu d’estudiu ya investigación», con estes pallabres presenta’l Conceyu de la Gaita esta actividá que cunta cola collaboración de la Banda Gaites de Noreña, l’Academia y Banda de Música de Noreña y l’Ayuntamientu de Noreña.
Semeya estrayía del blog payueles.
Suscríbite a les nuestres novedaes
