La Banda… Latira! ta a piques de finar el Verkami qu’entamaron pa financiar el so próximu proyectu: asoleyar el so primer discu con once temes de música tradicional asturiana y bretona, y composiciones propies. Aprovechando esta última selmana de micromecenazgu, espublicen el primer single del trabayu, «Le voyage rêvé», un tema compuestu por Nicolas Radin, exemplu de la so enerxía folixera y la mestura de músiques, ritmos y testures que caracteriza a la bandina astur-bretona. Entrevistamos a la formación p’afondar más nes son esperiencies, procesu creativu y otres cuestiones.
Anque agora vayáis a sacar el vuestru primer discu, yá lleváis más de 10 años de camín andáu. ¿Cómo, cuándo y por qué nació La Banda… Latira!?
La Banda… Latira! naz de la idea de Nicolas Radin de facer una orquestina qu’amestara la cultura asturiana y bretona desendolcando un proyectu al rodiu de les artes de cai. Foi’l Festival Roué Waroch de Plescop el que sofitó la idea y fizo que la nuestra primer actuación tuviera llugar ellí nel añu 2011.
P’arrancar esti grupu, Nicolas decidió xuntase con Morgane Labbe al curdión y col percusionista François Tiger, colos que yá tocaba nesi momentu nel Tríu Mabir. Y pela parte asturiana, col percusionista Diego C. Camiña y el gaiteru Llorián García a los que conociera nel Festival de Lorient en 2006. Nel planu más personal podría dicise que l’alcuentru de Nico y Diego fízose gracies a Marie Le Cam, gaitera bretona mui conocida n’Asturies, que foi la que los presentó. Foi equí onde xurdió l’interés d’unos pola cultura de los otros. La idea yera formar un equipu polifacéticu con ganes de compartir les sos cultures y atopar conexones ente elles. La xuntura de los instrumentos del percusionista asturianu y el bretón foi’l «pegamentu musical» qu’entemeció tol proyectu creando una «batería completa» pa tocar na cai.
«La idea yera formar un equipu polifacéticu con ganes de compartir les sos cultures y atopar conexones ente elles. La xuntura de los instrumentos del percusionista asturianu y el bretón foi’l pegamentu musical qu’entemeció tol proyectu»
Sois un proyectu astur-bretón y nun sois l’únicu. Yá conocemos esperiencies que venceyen estos dos países celtes como Breizh-Asturies Project o Muga. Esto nun ye tan común ente otros países del Arcu Atlánticu. ¿Por qué creéis que se produz tanta interrellación ente Asturies y Bretaña?
Esta rellación vieno influyía a les clares pol Festival Intercélticu de Lorient, que foi quien punxo a Asturies nel mapa del Arcu Atlánticu y la música “celta”. Más concretamente, gracies a Lisardo Lombardía, qu’ayudó a Nicolas a descubrir la música tradicional d’Asturies al traviés de les cantantes y de la pareya de gaita y tambor. Amás, Bretaña y Asturies tamién comparten ente sí más elementos culturales que con otros territorios atlánticos. Les dos fueron sociedaes sobremanera rurales hasta nun va tantu tiempu, onde les formes de vida y de producción de la sociedá tradicional se caltuvieron en formes asemeyaes. Les sestaferies o andeches, les formes de disfrutar de los bailles o la cultura sidrera son dellos exemplos.
El nuestru proyectu foi’l primeru que conectó musicalmente estes dos cultures y más alantre fueron xurdiendo otros como Breizh-Asturies Project. Nesti casu, Nicolas xuntaríase a Fanch Loric nel añu 2000 pa crear esti proyectu d’escenariu qu’entemez la enerxía de la música pal baille al rodiu de seis músicos bretones y dos cantantes asturianes, y qu’anguaño sigue activu.
«Les sestaferies o andeches, les formes de disfrutar los bailles o la cultura sidrera son dellos exemplos de lo que compartimos»
N’Asturies tocáis davezu con una bona aceptación per parte’l públicu. Y en Bretaña, ¿Tamién tocáis tanto? ¿Cómo se recibe la vuestra propuesta?
Lo mesmo en Bretaña como n’Asturies, tenemos tocao tanto en pequeñes sales como en dellos de los festivales más importantes: Arcu Atlánticu de Xixón, Festival de Cornouaille (Quimper), Festival Internacional de la Gaita FIG (Villaviciosa), Festival Intercélticu de Lorient, Les tombées de la Nuit à Rennes, La Noite Celta de Porcía, Festival Intercélticu d’Avilés, Les Traversées de Tatihou, les Nuits de Nacres à Tules… Tenemos la suerte de poder tocar en dambos llugares, y tamién fuera d’ellos, y siempre con gran aceptación. Lo que buscamos nel formatu de cai ye tar lo más cerca posible de la xente pa poder compartir la nuestra enerxía col públicu.
Ye llamadero como de magar qu’Asturies participa nos festivales bretones va yá unos 40 años, el públicu percibe d’un xeitu bastante normal los nuestros instrumentos tradicionales como la gaita, el tambor o la pandereta. Eso choca cola nuestra esperiencia n’otros países, como Canadá o Portugal, onde sí que resultaben más exóticos y aún así’l proyectu foi a llegar a la xente.
«Tenemos la suerte de poder tocar n’Asturies y Bretaña, y tamién fuera d’elles, y siempre con gran aceptación. Lo que buscamos nel formatu de cai ye tar lo más cerca posible de la xente pa poder compartir la nuestra enerxía col públicu»
Les persones d’Asturies que tocáis en La Banda… Latira! sois bien conocíes per equí, porque participáis d’otra montonera proyectos. Pero de les de Bretaña nun sabemos tanto, ¿en qué formaciones de música bretona participen?
Nicolas tien tocao en dellos grupos como Kantren, Birrien-Radin, Dam’ Fonk… Al mesmu tiempu a esti trabayu personal, tien actuao en conciertos con Dan Ar Braz, Carlos Núñez y Alan Stivell. Tamién dirixó’l Bagad de Lann-Bihoué durante 2 años y trabayó en creaciones artístiques binacionales nel estranxeru, ún de cuyos formatos yera la xuntanza d’artistes de Bretaña y artistes llocales estranxeros sofitaos por delles embaxaes ya institutos franceses. Más alantre fizo residencies y xires pa trabayar en distintos proyectos internacionales: Estaos Xuníos (Glaz Road), Marruecos (Trek y Sahar Armorik), España (Brasture), Inglaterra (Exit Factory#1), Turquía (Exit Factory#2), Québec (Creación pal festival Mémoire et Racines), Kuwait (Salak), México (Percepcíon), Burkina-Faso (Orében)… Anguaño toca col grupu Stong, el Breizh-Asturies Project, el dúu Madec-Radin, La Colossa y Treant.
Floriane vien de la chanson francesa, primeramente como intérprete y depués como cantante. Siempre tuvo nel mundu del baille -dende va años hasta güei- nun estilu musette y “variété”, y más concretamente nuna formación llamada «A4» compuesta por 4 músicos que busquen defender al 100% la música en directu. Dempués somorguióse na cultura bretona y dende va dos años toca nel grupu de Fest Noz «Kalon».
Tais a más de 1.000 kilómetros de distancia. ¿Cómo ye’l procesu creativu y los ensayos asitiándovos tan lloñe?
De primeres pensamos l’estilu, el ritmu y la intención que queremos dar a les nueves pieces del repertoriu de La Banda…Latira! cola idea d’intercambiar nuestres cultures inspirándonos nes músiques del mundu. Depués, faise un trabayu de recopilación de pieces tradicionales que nos puedan encaxar con esta idea. Cuando les tenemos, ye Nico quien se pon col procesu de reescritura y composición.
Enantes de los ensayos, se graben les pistes y envíense a cada músicu pa que les trabaye individualmente permitiendo tamién les sos aportaciones personales. P’acabar, a lo llargo l’añu, facemos residencies de trabayu onde nos alcontramos físicamente pa ensayar y trabayar esti repertoriu. Na mayoría de les veces son los dos músicos bretones los que viaxen a Asturies pa ensayar. Too esti trabayu requier una bona organización que ye mui importante pa que’l procesu musical garre forma.
Cuando fales con intérpretes d’Asturies, suelen destacar les diferentes condiciones llaborales qu’hai ente la xente profesional de la música n’Asturies y en Bretaña. ¿Podéis afondar nello? ¿Y cómo vos afecta esto nel grupu?
El sector de la música y de la cultura en Francia ta profesionalizáu dafechu dende fae décades y eso nótase a la hora de facer un proyeutu como esti. Anque n’Asturies entamen a dase pasos en materia de cobertura llegal de los músicos, altes y baxes llaborales, etc. la cobertura y sofitu qu’esisten en Francia a la hora de viaxar, del tiempu que nun tas n’activu como intérprete pero qu’inviertes en preparar nuevos proyeutos, por poner dos exemplos, ye dafechu mayor.
El gobiernu francés sofita la creación artística esixendo a los artistes que den polo menos 45 conciertos nun añu, y asina, al añu siguiente se-yos mantién con un sueldu (con un estatus de “intermittent du spectacle”). Esto permite a los músicos dedicar tiempu pa crear, trabayar colos sos instrumentos y desenvolver proyectos orixinales. Per otru llau, el Conseyu Rexonal de Bretaña, al traviés de les sos subvenciones, presta un gran sofitu a la música tradicional en toles sos variantes d’estilos y estétiques.
«Anque n’Asturies entamen a dase pasos en materia de cobertura llegal de los músicos, la cobertura y sofitu qu’esisten en Francia a la hora de viaxar, del tiempu que nun tas n’activu como intérprete pero qu’inviertes en preparar nuevos proyeutos ye dafechu mayor»
Sicasí, decidistis grabar el discu n’Asturies en cuenta d’en Bretaña. ¿Por qué?
Conocemos el trabayu de Sergio Tutu dende va bien d’años y la so esperiencia grabando y sonorizando música folk y tradicional con una montonera de grupos. Pa nós taba bastante claro que la cercanía y profesionalidá de Tutu diba facer muncho más fácil el procesu de grabación del discu. Sicasí, una parte del CD también ta enrexistrada en Bretaña, ya qu’invitamos a la primer cantante-curdionera de La Banda… Latira! a participar nel discu y grabamos la so voz nel estudiu de Heikki Bourgault.
Tampoco ye mui común que formaciones del vuestru calter graben discos y menos nestos tiempos nos que cuasi nun s’asoleyen CDs. ¿Por qué vos embarcáis nesti proyectu?
Munches veces preguntábennos nes actuaciones si teníemos discu pa vender y siempre tuvimos esa idea na tiesta, pero como toos tenemos munchos proyectos artísticos aparte, yera complicao bloquear les feches pa dedicanos a tol procesu que requier la grabación d’un discu. Hasta agora, cuando conseguíemos atopar dalgo de tiempu teníemos que dedicalu primeramente a trabayar el nuevu repertoriu.
Cuando a la fin decidimos embarcanos nos nuevos proyectos artísticos que tenemos en mente pal próximu añu 2025, volviéronnos a entrar les ganes de grabar el nuestru repertoriu pa poder plasmar esta música y por eso decidimos buscar la forma de facelo. Pa nós yera importante pasar esta etapa y llegar más allá de la cai pa que la xente tamién pueda disfrutar de la música en cualquier llugar.
«Pa nós yera importante plasmar el nuestru repertoriu y llegar más allá de la cai pa que la xente tamién pueda disfrutar de la música en cualquier llugar»
¿Qué vamos poder sentir nesti primer álbum?
El repertoriu d’esti primer trabayu espeya perbien lo que pue sintise nuna actuación de La Banda… Latira!. Amiestos de melodíes tradicionales mesmo asturianes como bretones arreglaes con tratamientos armónicos propios d’estilos actuales, que van dende la música llatina al rock, d’Europa del este, pasando pel funky o l’afrobeat , D’esta forma atopamos repertoriu asturianu como xotes, muñeires, dances o un pericote xunto a bailles bretones como’l plinn, la gavotte pourlet, el rondó o’l kas ha bar.
Pa que’l discu vea la lluz primero tenéis qu’algamar el crowdfunding. Asina qu’aprovechái estes llinies pa convidar a la xente a participar nél.
Como tol mundu podrá imaxinase, el fechu de grabar un discu y amás cola dificultá de ser un grupu onde los sos músicos viven en llugares bien estremaos, implica una inversión perimportante de tiempu y también de perres. Ye por eso que quiximos aprovechar esta oportunidá que nos da’l micromecenazgu p’ayudanos a sofitar el proyectu ofreciendo diferentes recompenses. Les más económiques van dende’l discu físicu o la descarga dixital, y depués hai otres como’l pack con cerveces bretones y asturianes, la bolsa de tela 100% orgánico col diseñu de l’artista Sila Herrera -que foi quien nos fizo los visuales del discu-, amás de los sos visuales en formatu postal o cuadru.
También hai otres opciones como actuaciones privaes o pa festivales y unes más simpátiques que’l que quiera conocer tendrá qu’entrar a veles na plataforma Verkami pa nun desvelalo too equí. La verdá que tamos mui contentos cola acoyida y l’ayuda que tamos recibiendo magar que falten mui pocos díes p’algamar l’oxetivu, asina qu’animamos a tola xente que-y preste’l nuestru proyectu -o aquella que nun lo conoza y quiera facelo- a echanos un gabitu pa sacar esti discu col que tamos tan ilusionaos.
«Falten mui pocos díes p’algamar l’oxetivu, asina qu’animamos a tola xente que-y preste’l nuestru proyectu a echanos un gabitu pa sacar esti discu col que tamos tan ilusionaos»
Amás de lo astur-bretón, tenéis dos señes d’identidá que se ven a primer vista. La estética y l’humor. ¿Qué podéis cuntar d’elles?
Cuando toques na cai, la conexón col públicu siempre ye más abegosa, porque dellos de los espectadores nun vinieron a costafecha a sentite. Lo que nos presta ye dir a buscalos y que se queden con nós faciéndo-yos partícipes del nuestru espectáculu.
Dende l’entamu quiximos trabayar nuna identidá visual, asina que pidimos al taller del modistu Romuald Hervé que trabayaren con nosotros nuna idea contemporánea de la evolución de los traxes de Bretaña y Asturias, combinando pieces d’unu colos traxes del otru. En toles pieces del repertoriu trabayóse tamién col llinguaxe corporal, y tamién ye verdá que préstanos muncho dar dellos toques de comedia a les actuaciones.
«En delles ocasiones tocar na cai ye muncho más desixente que tocar nun escenariu, porque’l trabayu musical y la enerxía de les intenciones tienen que multiplicase por diez ensin un sistema d’amplificación»
Y yá per último, sois una formación de cai, d’interactuar col públicu. ¿Qué coses vos aporta como músicos el tocar a pie de cai?
En tolos sentíos ye un tipu d’interacción diferente a l’actuación n’escenariu. Pa nós ye importante defender un espíritu popular cola música de conciertu. Préstanos enforma tocar pa la xente, y munches vegaes, cuando queremos crear una imaxe o escena, vamos tocar pa una persona del púplicu, lo que val pa que’l restu la xente vea esi cuadru dende fuera. Amás, en delles ocasiones tocar na cai ye muncho más desixente que tocar nun escenariu, porque’l trabayu musical y la enerxía de les intenciones tienen que multiplicase por diez ensin un sistema d’amplificación.
Tamién ye un compromisu políticu, porque esti plantegamientu val pa que la xente que nun va a conciertos porque nun puede pagalos esfrute d’una experiencia artística completa y gratuita. En cada una de les nuestres actuaciones, falamos de los nuestros países y llingües durante’l conciertu, col oxetivu de compartir una música abierta al mundu al tiempu que defendemos les nuestres cultures.
Suscríbite a les nuestres novedaes
