Güei cúmplese un añu dende que’l plenu de Xixón aprobó por amplísima mayoría la moción en defensa de la música n’asturianu; una respuesta a les intenciones manifestaes pola ex conceyal de festexos de Vox, Sara Álvarez Rouco, de vetar la música n’asturianu nesa ciudá. Muncho cambió la cosa na villa de Xovellanos nesti tiempu y, dempués d’un procesu que tuvo más polémiques declaraciones en prensa y repercusiones nel plenu, güei Xixón ye’l conceyu cola programación cultural institucional que más ta apostando esti branu pola música asturiana. «Protexer, defender y espardir el nuestru patrimoniu cultural, ha ser la obligación de cualquier gobiernu nesta tierra», foi una frase que pronunció naquel plenu del 1 d’agostu de 2023 el forista Jesùs Martínez Salvador, actual conceyal de Festexos y portavoz del gobiernu. Sicasí, dalgo que ye de sentíu común, nun se pon en práctica.
Fiestes de Lugo: 30 conciertos; 10 de música gallega. Bilbao: 20 conciertos; 10 de música euskaldun. A Coruña: 12 conciertos ; 2 de música gallega. Barakaldo: 14 conciertos; 9 d’artistes euskaldunes. Estes cifres de les comunidaes vecines con llingua propia tán sacaes de los programes festivos entamaos polos sos respectivos ayuntamientos en 2023 pa los escenarios principales. Na mayoría de los casos suponen más del 30% de la programación. N’Asturies la comparación ye frustante y supón hasta un despreciu pa cola xente que ta creando cultura nesta tierra: l’añu pasáu nin San Mateo n’Uviéu nin San Agustín n’Avilés, nin la Semanona en Xixón programaron nengún conciertu de música asturiana nos escenarios más destacaos.
«Nes fiestes de Lugo, Bilbao o Barakaldo los conciertos de música fecha nes llingües propies nos escenarios festivales que programen los ayuntamientos suponen más del 30% de la programación»
Esti 2024 Xixón ta cumpliendo col compromisu alquiríu cola aprobación de la moción: recupera l’Arcu Atlánticu -nel que la música’l país ta bien presente-, programa a Rodrigo Cuevas y a Hevia nel escenariu de Poniente, y entama o sofita una bayura d’actividaes venceyaes a la cultura tradicional que se celebren alrodiu la Semanona. San Agustín lluz cartelería n’asturianu y programa a Nuberu -dientro del festival La Mar de Ruido- y a Marisa Valle Roso na esplanada del Niemeyer. San Mateo, pel momentu, nun anunció nin un artista de música n’asturianu; dando asina’l llombu a la tradición qu’existía na capital de programar daqué de música’l país nel escenariu de La Catedral.
«La lóxica de les polítiques culturales públiques ha ser la d’apostar pola creación cultural propia pa que la demanda del públicu seya mayor y p’asina fortalecer profesionalmente al sector musical asturianu»
N’otros conceyos más pequeños la situación ye asemeyada o peor y estes cifres vuelven amosar la ruina apuesta que faen les conceyalíes de festexos asturianes por programar música autóctona nes fiestes llocales. Ye una anomalía si lo comparamos colos exemplos mentaos enantes de Galicia y País Vascu. Ye verdá que’l consumu y la demanda de música propia ye xeneralmente muncho menor equí qu’ellí. Pero, precisamente, la lóxica de les polítiques culturales públiques nun ha basase esclusivamente nesi criteriu mercantilista y la so misión ye la de da-y la vuelta a la tortiella: apostar pola creación cultural propia pa que la demanda del públicu seya mayor y p’asina fortalecer profesionalmente al sector musical asturianu.
Nun hai meyor escaparate pa la música y pa la normalización llingüística que dar un conciertu énte milenta persones nel escenariu principal de les fiestes del conceyu. Ye un reconocimientu a los y les artistes llocales; supón aumentar el públicu potencial pa eses propuestes musicales; crea arguyu, autoestima y sentimientu de pertenencia ente la sociedá. Les consecuencies son positives dende una perspectiva económica, social y cultural; polo qu’urxe que los responsables políticos autonómicos y municipales garren conciencia sobre esta cuestión y apuesten por programa música asturiana nes fiestes llocales. Ye invertir en futuru pa esti sector.
Suscríbite a les nuestres novedaes
