José Ángel Hevia (Xixón, 1967) ye’l gaiteru asturianu más popular de tolos tiempos. La so carrera entamó bien ceo y xorreció per tol mundu en 1998, cuando asoleyó Tierra de Nadie, álbum col que llegó a vender n’Europa 1.750.000 copies, un fechu que lu llevó a ser gallardonáu col Platinun Europe Award va 25 años. Pa conmemorar esta distinción, la Semanona de Xixón acueye esti martes 6 d’agostu, a les 23 hores, un conciertu perespecial nel escenariu asitiáu en Poniente. Nél Hevia va tar acompañáu de Beleño, L-R, la Banda Gaites de Candás, Mariluz Cristóbal Caunedo, Pau Santirso y María Vázquez, amás del cántabru Nando Agüeros y la madrilana Pasión Vega. Falamos col gaiteru maliayu p’afondar nello y pa tratar otres cuestiones con esti artista que siempre caltuvo un compromisu firme cola cultura y cola llingua asturiana.
Va 25 años vendisti más d’un millón de copies d’un discu. Esa cifra güei ye impensable hasta pa grandes artistes mainstream. Nesti tiempu que se faló tanto de distintes crisis, la de la industria musical foi de les gordes. ¿Cómo valores esto?
Sí, efectivamente, a mí garróme con Tierra de Nadie los últimos coletazos de les ventes de discos. Yo creo que dende entós yá nun hebo oportunidá d’algamar ventes millonaries con más discos, al menos n’esti país. Cayóse la industria discográfica, son cambios de modelos de negociu radical. Nesti momentu nun se concibe la música como se concebía nel añu 98. Tierra de Nadie alcanzó n’Europa 1.750.000 de copies y tovía dempués llegamos a más de 2 millones y picu colos discos siguientes, pero too en tornu a esi cambiu de sieglu. Hai una xeneración de xente mozo que nun puede concebir la música en cuanto a negociu como se concebía nel añu 98, imposible. Los que siguimos viviendo de la música, adaptámonos de dalguna manera y siguimos viviendo d’ella, pero ye otru planeta, digamos.
«Tierra de Nadie algamó n’Europa 1.750.000 copies y tovía dempués llegamos a más de 2 millones y picu colos discos siguientes. Nesti momentu nun se concibe la música como se concebía nel añu 98»
Xixón va ser la ciudá qu’acueya esti conciertu tan especial. ¿Por qué Xixón?
Yo en Xixón nací dos veces. Nací una va 56 años y 10 meses nel Sanatoriu Begoña, y otra vez volví a nacer cuando empecé a tocar la gaita nel Grupu Covadonga de la mano d’Armando Fernández Robledo, que fue ún de los grandes docentes de la mio vida -eso inclúi dende parvulitos hasta la universidá-. Esti gaiteru -que por suerte ta n’exerciciu tovía- fízome nacer al mundu de la música tradicional, al mundu de la gaita, de les tradiciones… Non solamente cola música sinón coles histories que me tresmitió al rodiu d’esa música. Xixón ye puntu de partida. Nesti casu ye puntu de partida d’un nuevu proyectu: festexar de dalguna manera esos 25 años; facelo con un discu que vamos asoleyar esta seronda, y entamar una nueva xira revisitando aquel Hevia del 98, apurriendo coses nueves.
«Xixón ye puntu de partida. Nesti casu, de festexar de dalguna manera esos 25 años y facelo con un discu que vamos asoleyar esta seronda, entamando una nueva xira revisitando aquel Hevia del 98»
Precisamente, va un añu per estes feches asoleyabes l’artículu Adiós, Villa de Xixón, a cuenta de ciertos sectores del Ayuntamientu que queríen vetar la música n’asturianu nes programaciones festives. Al final ganó’l sentíu común…
Yo creo que les coses trátense precisamente d’esta pallabra: sentíu común. Va un añu nun podía tar calláu porque les coses hai que reivindicales cuando son inxustes, nel momentu xustu, y unu nun puede callar. Nun fice munchu seguimientu de lo que pasó a partir d’entós. Lo que sé ye que va unos meses llamóme’l productor Enrique Granda y ofrecióme facer esti conciertu conmemorativu en Xixón. En nengún momentu falamos nin d’aquel problema cola llingua asturiana nin de nengún vetu a naide y nun sé, les coses avanzaron d’una manera absolutamente fluida. Acabo de tar nel Ayuntamientu de Xixón con conceyales nuna rueda de prensa y en nengún momentu hebo nenguna alusión a aquel episodiu nin nada. Yo, felizmente, creo qu’aquello, como dices, primó’l sentíu común.
Sigo siendo un artista qu’utiliza dos de les tres llingües que falamos n’Asturies -la tercera utilízola menos porque nun la domino, que ye’l gallego-asturiano, pero l’asturianu y el castellanu conviven d’una manera normalizada nes mios presentaciones y naide dende l’ayuntamientu me dixo nada nel sentíu de que nun lo utilizara, d’aquel artículu, nun se faló de nada. Esti conciertu surdió d’una manera absolutamente fluida y ta marchando d’una manera absolutamente fluida, colo cual yo creo que tenemos que felicitanos toos de qu’aquel triste episodiu quedara yá nel olvidu.
«Va un añu nun podía tar calláu porque les coses hai que reivindicales cuando son inxustes, nel momentu xustu. Tenemos que felicitanos toos de qu’aquel triste episodiu col asturianu en Xixón quedara yá nel olvidu»
El conciertu va tener collaboraciones mui especiales. Ente elles, la de Beleño, que vuelven a xubir a un escenariu dempués de 35 años y de los que vais tocar dos temes. ¿Qué supunxo pa ti esta formación?
Préstame cuntar lo de Beleño porque ye una reconocencia d’onde venimos. Beleño yeren unos años mayores que yo. Frankie, col que tengo muncha rellación, tien un par d’años más que yo y yá formaba parte d’esi grupu que nel añu 1983 actuó na ilesia de Cabranes. El casu ye que cuando yo vi, cuando yo sentí una gaita acompañada por un arpa, por una guitarra, por una zanfona, por un violín -dempués de llevar unos siete o ocho años tocando lgaita y tambor, peles romeríes y con grupos de baille-, yo aquel día dixe: yo lo que quiero facer ye esto, lo que tán faciendo estos rapazos. Puedo decir que me dedico a esti tipu de música porque fui a aquel conciertu aquel día y porque vi a Beleño, al histórico Fernando Largo allí col arpa, a Frankie, al gaiteru titular de Beleño, Juanjo Prado, que sigue siendo’l gaiteru titular de Beleño independientemente de que nun te faciendo los directos.
El casu ye que va a unos meses Frankie Delgado llamóme col proyectu de revitalizar Beleño y pensara en mí como gaiteru, y digo: bueno Frankie, nun puedes decime cosa que más ilusión me faga que facer directos con Beleño. Yá tuvimos una esperiencia en petit comité, un conciertu mui íntimu en casa Pepín Muñalén y aquello funcionó de maraviya. Beleño ta vivo y ta vivo con miembros fundadores y otros miembros que de dalguna manera fuimos averándonos a la formación, pero que tenemos polo menos vinculación sentimental con ella. Toos tenemos vivencies históriques con aquel Beleño d’entós, dalgún venceyu col Beleño d’entós; nun somos rapazos que llegamos ensin conocelo.
«Préstame cuntar lo de Beleño porque ye una reconocencia d’onde venimos. Cuando yo sentí una gaita acompañada por un arpa, por una guitarra, por una zanfona, por un violín, yo aquel día dixe: yo lo que quiero facer ye esto, lo que tán faciendo estos rapazos»
Ente les munches bandes de gaites qu’hai n’Asturies, escoyisti la de Candás p’acompañate esa nueche. ¿Por qué?
La de Candás fundéla nel añu 1989 y sigo teniendo muncha vinculación con ellos, non solamente nel conciertu de Xixón tán presentes, sinon qu’a lo llargo d’estos años tuvieron en munchos conciertos per munchos países; dende’l Vaticano a Xapón. La banda de Candás ye como cuando tienes una estaya qu’atender nun prau o una tierra, y el vecín viene a apurrite una mano esi día ensin preguntar. Un día fákgolo yo nun acto d’ellos y otru día faenlo ellos nel actu míu y asina llevamos 25 años.
El mundu de la música y el baille tradicional va tar representáu pola propuesta post-folk de L-R y polos bailladores Pau Santirso y María Vázquez. A vegaes paez que s’imponen narratives que pretenden confrontar la escena más tradicional cola del folk/celta, pero precisamente esti convite ye una amuesa de cómo los dos mundos pueden convivir y arriquecese mutuamente, ¿Cómo lo ves tú?
Yo véolo que nun ye diferente uno de lo otro. Cuando yo entamaba a dar clases de gaita na metá de los 80, yo ponía-yos siempre a los escolinos los discos de Manolo Quirós, los de Beleño y los de Silvino «el de Mieres» -un gaiteru mui tradicional-. Que ún tenga’l so estilu y tenga la so querencia musical nun quier decir que lo que faigamos nun sea too música asturiana. La esperiencia con Pau, María y cola xente de Xeitu y esta manera d’entender el baille vien yá d’un conciertu que dimos en Lorient va unos dos o tres años a lo llargo del Festival de Lorient nel que Xeitu taba presente delantre l’escenariu, ente’l públicu. Ehí vimos que la participación natural de xente con pasos tradicionales, con baille tradicional y inventáu sobre la marcha, esa participación espontánea yera más importante incluso que facer una coreografía enriba l’escenariu. Ta más vivu’l baille si lo facemos participando y disfrutando d’él. El que sabe, amosando un poco a los que nun saben, y los que nun saben, disfrutando de lo que puedan facer, ensin despreciar les coreografíes d’escenariu. María y Pau van tar tamién presentes enriba l’escenariu en dalgún momentu del conciertu, pero equí lo importante ye que se sienta vivu’l baille ente la xente, mesmo’l que sabe muncho de baille como’l que nun sabe.
«La participación natural de xente con pasos tradicionales, con baille tradicional y inventáu sobre la marcha ye más importante incluso que facer una coreografía enriba l’escenariu. El baille ta más vivu si lo facemos participando y disfrutando d’él»
Otra de les collaboraciones ye la de Mariluz Cristóbal Caunedo. Nestos 25 años los discos más éxitosos de música asturiana fueron Tierra de Nadie y Manual de Romería de Rodrigo Cuevas, y nos dos suena la voz de Mariluz. Pa ti, ¿qué significa Mariluz Cristóbal Caunedo dientro de la música’l país?
Si te digo lo que significa, véseme mucho’l cariñu personal. Préstame esa espresión que s’acuñó yá va 25 años, de «la gran dama de la tonada asturiana», un poco emulando asina lo que se decía de Dolly Parton, la gran dama. Yá no personal, home, yo toi mui agradecíu y tengo un cariñu mui especial por ella. A mí préstame de vez en cuando contar una anécdota qu’ella tamién repite muncho. Una de les ocasiones que fuimos a tocar al festival de San Remo, el presentador yera Luciano Pavarotti. Tocamos el «Busindre Reel», Mariluz salió na parte que canta -salió too perfecto-, salimos del escenariu, vino Pavarotti y abrazó a Mariluz: «¡Signora, grandissima, bellissimo, bravissima!». Afalagóla y beso-y la mano. Decía Mariluz: «esta mano nun vuelvo a lavala nunca, ¡besómela Pavarotti!».
Pensando nestos 25 años, tú fuisti una persona fundamental nel boom que la gaita vivió n’Asturies a finales de los 90. ¿Cómo ves anguaño la salú d’esti instrumentu? ¿Y de la música asturiana en xeneral?
Pues munches veces pensé «coime ya nun tamos en superventes como tábemos va años, yá nun hai tantos grupos». De toes maneres, yo nunca mido los fenómenos culturales polos momentos culminantes, polos picos, polos momentos nos que determináu artista vende más, o, qué sé yo, clases sociales, sectores sociales, sectores d’edá s’averen más al instrumentu… Yo nun lo mido polos momentos más altos, sinon polos más baxos. Entós, si trazamos una llinia progresiva que va uniendo los puntos más baxos, vemos que la tendencia ye hacia arriba dende los años 70 hasta güei, imparable. Agora mesmo nun tamos nun puntu altu, pero tamos muncho meyor de lo que tábemos a finales de los 70.
Hai unos instrumentos que s’estudien nel conservatoriu y n’academies especializaes con una base yá mui académica; hai cientos y cientos de chavales que siguen estudiando -non namás gaita, sinon curdión, zanfona, flauta-; el baille ta recuperado d’una manera ablucante -cuando va unos años permanecía casi namái que la coreografía d’escenariu, anguaño tenemos un baille que está vivu-; la tonada ye curiosísimo porque taba nun sector d’edá y nun ambiente que l’abocaba a la desaparición nuna década, y esto fue va 30 años… Pues la tonada güei día hai guah.es que s’averen a ella y hai grandísimos intérpretes. El discu d’Héctor Braga a mí paezme monumental, al rodiu la tonada, una cosa monumental fecha güei col fundamentu de lo d’enantes, ensin inventar nada, pero con una pefección técnica del sieglu XXI.
Yo soi mui optimista. Otra cosa ye que nestos momentos la xente, quitando que vivimos un momentu dulce tocante a la difusión de Rodrigo Cuevas -por exemplu-, pero nun tamos nun momentu nel que’l folk seya una música de gran tirón. Lo qu’importa ye que cuando nun tamos nun picu de montes sinon nun fondu de valle, la tendencia sigue siendo mui al alza dende va décades.
«Nun tamos nun momentu nel que’l folk seya una música de gran tirón, pero lo qu’importa ye que cuando nun tamos nun picu de montes sinon nun fondu de valle, la tendencia sigue siendo mui al alza dende va décades»
Tierra de Nadie publicóse nun momentu nel que paez que la llamada world music taba “de moda” y, quiciabes, anguaño tamos nel momentu más asemeyao a aquel, cola repercusión que tán teniendo proyectos venceyaos a la música de raigañu como’l de Rodrigo Cuevas o, fuera d’Asturies, Tanxugueiras. Pa ti, como embaxador cultural d’esti país que yes, ¿Qué supón too esto pa Asturies dende una perspectiva económica, social y cultural?
Bueno, yo tengo que dicir que nun soi embaxador de nada, la verdá. Yo fice y faigo la mio carrera pa mí. Obviamente, tien que trescender a la fuercia lo que faigo, el llabor por Asturies, la tradición, y supongo qu’eso beneficiará de dalguna manera a Asturies, pero nun me siento nin embaxador nin héroe de nengún sitiu. Yo trabayo pa mí como cualquiera trabaya pa sí. Entós, el títulu d’embaxador agradézolu pero nun puedo asumilu.
¿Qué supón too esto de que se conoza lo que facemos en música, cultura n’Asturies, más alló de les nuestres fronteres? Yo creo que, claramente, hasta economía. A veces, en Madrid -yo vivo en Madrid- voi a un restaurante y alcuentro na carta «pixín». Dame por preguntar «oye, ¿este restaurante ye asturianu?» «Non». «Entós, ¿por qué ponen pixín?» «Bueno, es que como Asturias lo llaman pixín». Ye dicir, un matiz como poner pixín al rape en Madrid aporta dalgo n’aquella carta d’esi restaurante. Y quien lleve’l restaurante, sábelo, dende’l puntu de vista del marketing, nun resta nada sinón qu’aporta más sabor, nel sentíu figuráu, a esi platu. Esta valoración de lo nuestro, qu’a veces fáltanos en casa, cuando la esportes d’una manera natural, yo creo que se valora muncho más que cuando lo lleves por bandera. Sí ye mui importante toa esta esportación involuntaria, ye mui buena y hasta xenera economía. Ehí lo tienes. Lo cierto ye que los elementos culturales, ensin necesidá de facer campañes oficiales, sinon el día a día del trabayu, son más esportables.
Y yá que tocasti per mediu mundu y conoces esperiencies estremaes de xestionar el fechu cultural, ¿Cómo podríen les polítiques culturales asturianes sacar más provechu a esta riqueza cultural que tenemos?
Voi poneme un poco reivindicativu. Asturies ye una comunidá mui pequeña, con un millón escasu d’habitantes. Entós, claro, a la hora de competir con otres comunidades -competir nel buen sen, porque nun falo de competencia comercial-, tenemos esi problema’l primeru. Somos una comunidá mui pequeñina, nun somos el centru del universu. L’otru día, falando con Josep-Maria Ribelles -que ye catalán, pero ye l’arpista que toca en Beleño, y gran admirador de Beleño dende la época inicial-, decíame nun ensayu que tuvimos n’Asturies: «es que estas carreteras, es que, claro, venir a Asturias es precioso, es maravilloso, pero hay que venir, porque, claro, Cataluña está situada tan bien geográficamente, que hay que pasar por ahí para todo». Yo nunca pensara neso. Resulta que los asturianos, y yo’l primeru, pensamos que’l centru del universu ye Asturies, pero nun lo ye. Nun somos siempre conscientes d’eso.
Lo segundo, y esto ye la parte reivindicativa, artistes de comunidaes como Euskadi o Galicia cuenten con un apoyu mui fuerte de les propies comunidaes, conscientes los gobiernos d’esto que falábemos enantes, de qu’eaportar cultura ye, a la fin, exportar imaxe y xenerar economía. Cuando un asturianu sal fuera, nun cuenta con eses ayudes. Un grupu, por exemplu, de Bretaña que venga a tocar a Asturies a un festival de bandes de gaites cuenta con una parte de los gastos del viaxe pagaos por Bretaña. Cuando un grupu gallegu sal fuera, la Xunta de Galicia cubre-y los gastos de desplazamientu y d’hoteles. Cuando un grupu d’Euskadi lo fai, si canta n’euskera, cuenta tamién col apoyu esi del gobiernu d’Euskadi. Los asturianos tenemos que salir yá compitiendo con esa base. ¿Facemos una música peor o meyor que la xente d’Euskadi? N’absoluto. Igual de calidá, igual de valoratible en términos culturales. Tienes que competir con que si vas a un festival a Málaga, yá vas a salir más caru porque’l viaxe tuyu nun lo ta pagando la comunidá. Yá sales con un handicap y un problema de competencia en precios. Yo nun falo d’Hevia equí, porque amás yo toi residiendo en Madrid, falo d’ayudes de los gobiernos, y esto hai que reivindicalo pa tol sector de la música asturiana.
«Artistes d’Euskadi o Galicia cuenten con un apoyu mui fuerte de los gobiernos, conscientes de qu’esportar cultura ye, a la fin esportar imaxe y xenerar economía. Esto hai que reivindicalo pa tol sector de la música asturiana»
Enantes d’acabar, y en rellación a esto que venimos falando, nunca ta de más reparar en datos y cifres qu’amuesen tol potencial d’una música asturiana que lleva esportándose mundu alantre dende los tiempos del Gaiteru Lliberdón. A lo llargo la to carrera, ¿Cuántos discos vendisti, en cuántos países tocasti, cuál foi’l llugar más llonxanu onde tocasti y la vez que más públicu axuntasti, cuánta xente foi?
El sitiu más sorprendente foi quiciabes el templu de Otobutai en Kyoto. Amás de la ubicación xeográfica, foi nuna fiesta relixosa que se celebra cada 50 años. Asina que tamos esperando a ver si llegamos a la próxima edición, nun sé, porque igual tamos un poco cascaos. Foi un sitiu mui sorprendente. El sitiu col que más públicu actué, yo creo que foi la Playa Los Cristianos en Tenerife, con unes 300.000 persones -si falamos d’un conciertu d’Hevia-, porque onde más xente tuve delantre, pero yá nun yera un conciertu d’Hevia, el artista yera’l Papa Ratzinger, y yo yera un convidáu, digamos. Esi foi en Milán nun aeródromu nel qu’había más d’un millón de persones. Los del fondu nun escuchaben si nun fuera porque había equipos de soníu cada 200 metros.
Discos creo qu’andamos pelos 2 millones y mediu de discos vendíos. Por supuestu, el que más se vendió foi Tierra de Nadie con 1.750.000 y coincidió yá cola cayida del negociu discográficu. Tocamos, amás, en tolos continentes quitando Australia, porque nunca tuvi, pero nun sé dicite, discos salieron en 50 y pico países, yo creo que toqué en 30 y pico o per ehí.
«El sitiu col que más públicu actué, si falamos d’un conciertu d’Hevia, foi la Playa de Los Cristianos en Tenerife, con unes 300.000 persones»
Y p’acabar, viendo lo especial que va ser lo de mañana, ¿Va quedar rexistráu n’audiu y videu?
Sí, vamos facer audiu y videu del eventu, nun sé si con intención de publicar. El discu que va a salir agora revisitando aquel Tierra de Nadie y de los primeros discos de la carrera nun ye un discu de directo, ye un discu que reinventa aquellos temes dende la óptica de la banda que tamos faciéndolo en directo, pero nun ye un discu grabáu en directo. Sicasí, la señal d’esti conciertu sí se va recoyer toa mesmo n’audiu como en videu.
Suscríbite a les nuestres novedaes
