La Bonturné gana’l XVI Premiu Camaretá con «Odisea la nuí»

El cuartetu de veteranos músicos impúsose a Héctor Braga, Ferla Megía y Susana Gudín nuna edición enllena de diversidá sonora.

La música asturiana yá tien ganador del premiu al meyor cantar pal añu 2023/2024. Trátase de «Odisea la nui» de La Bonturné, un tema bal-folk con toques swing y una reivindicativa lletra del escritor xixonés Francisco Álvarez. El cuartetu formáu polos veteranos músicos David Varela (voz y curdión), Merce Santos (zanfona), Santi Caleya (gaita y saxu) y David Casillas (contrabaxu) impúsose a los otros tres cantares nominaos nesti XVI Premiu Camaretá: “Llobatu“ d’Héctor Braga, “Medrana a Medrar“ de Ferla Megía y “Contigo de Susana Gudín.

El músicu Fernando Valle Roso y l’actriz Verónica Gutiérrez foron los encargaos de guiar esta gala que, per tercer vegada consecutiva, repitió escenariu nel Teatru de La Llaboral de Xixón. En TPA a la carta yá pue vese’l videu del espectáculu que tuvo como novedá la inclusión d’unes «sillones» qu’usaron tanto presentadores -asitiaos per primer vez nun llateral fuera del escenariu– como artistes nominaos y nominaes nos videos de presentación de los sos proyectos. Polo demás, el formatu siguió siendo’l mesmu que’l de les ediciones caberes.

Héctor Braga foi’l primeru en xubir a escena. Acompañáu de la so banda –guitarra, percusiones y teclaos-, reforciáu pola proyección audiovisuales del videoclip -qu’incluyía tamién la lletra subtítulada– y con un soníu impecable, el músicu llangreanu fizo una actuación contundente, dinámica y empobinada a enganchar al públicu. A les distintes influencies sonores de «Llobatu» –folk, rock y electrónica– sumóse-y la collaboración de dellos componentes de la Banda de Gaites Noega de Xixón na parte final del cantar, arriqueciendo la interpretación.

Llueu aportó’l turnu de La Bonturné. Los cuatro namás, colo cenciello de los sos instrumentos acústicos y pesie a que nun sonó la zanfona, tocaron con xeitu esti cantar qu’amuesa la personalidá d’unos músicos que lleven una montonera d’años tocando xuntos. «Odisea la nuí» ye de los pocos temes cantaos que tien so discu A Contraforga y nél la voz de David Varela empasta a la perfección cola lletra de Paco Álvarez que reinterpreta’l mitu de Penélope y Ulises. Una melodía animada y baillable fai lo demás. Como curiosidá, yera la segunda vegada que se veía enriba l’escenariu una zanfona, instrumentu que nun suel usase nes formaciones asturianes d’anguaño y qu’emplegaron nesti Camaretá tanto Héctor Braga como Merce Santos.

A diferencia d’otros años -nos que los cantares de ritmu sele tuvieron más protagonismu ente les nominaciones-, na décimosesta edición d’esti gallardón el momentu más intimista foi a cargu de Ferla Megía, l’artista más emerxente de toos. Esti xoven músicu xubió al escenariu acompañáu namás de la so guitarra clásica y d’otres ferramientes electróniques y enllenó l’escenariu d’orixinalidá y frescura. Pop, rap, canción d’autor y varios samplers, acompañaos d’una proyección audiovisual reflexaron que la Xeneración Z tien muncho que decir dientro de la música asturiana. Mesmamente la lletra «Medrana a medrar» esbilla coses que-y esmolecen a esta xeneración y éstes restallaron cuando’l músicu glayó «¡Vivienda de calidá! ¡Oficialidá darréu!» al final de l’actuación.

Llueu los presentadores entamaron a falar en gallego-asturianu, adaptándose a la llingua na que taba escrito’l siguiente cantar. La soprano lírica y actriz Susana Gudín xubía al escenariu de La Llaboral en formatu cuartetu pa interpretar «Contigo», cantar col qu’estrenaba’l so proyectu en solitario tres tener cantao en formaciones como Taranus y collaborao en discos d’artistes como Rodrigo Cuevas. Toques swing, pop y una desenfadada interpretación ye lo que caracterizó l’actuación d’una de les voces más reputaes del país que, cola so propuesta, enllena de novedá’l repertoriu de música fecha na llingua usada na fastera más occidental d’Asturies.

Darréu llegaba’l turnu del conciertu de Vero Rubio, ganadora del XVI Camaretá con «Dixo miou padre». L’artista canguesa tocó xunto a la so banda -formada mayoritariamente por muyeres y por componentes d’otros proyectos como Guieldu. La Bedur o Orquesta Céltica Asturiana– seis temes adelantu del que va ser el so primer discu. Mentanto, cada miembru del xuráu -formáu pola música y periodista Alicia Álvarez; el periodista y xestor cultural Xicu Ariza; la técnica en normalización llingüística Penélope Miranda; la música y filóloga Andrea Joglar; y la docente d’asturianu y panderetera Emma Posada-, puntuó del 1 al 4 a caún de los cantares finalistes. Nuna votación mui axustada, ganó «Odisea la nuí».

Per primer vez nes sos dieciséis ediciones, la persona responsable de la conseyería de Cultura del Principáu d’Asturies taba presente na gala y facía entrega d’un premiu qu’organiza’l mesmu gobiernu asturianu. Asina ye como, dempués de que Vero Rubio lleera’l nome, la conseyera de Cultura, Política Llingüística y Deporte, Vanesa Gutiérrez, entregó’l gallardón a los componentes de La Bonturné. El premiu inclúi 6.000 euros en metálicu, la realización d’un videoclip y participar dientro del circuitu Autores nel Camín.

Nos sos agradecimientos, David Varela y Santi Caleya, amosaron la so sorpresa y emoción al ser esti’l primer premiu qu’algamaben en toles décades que lleven tocando xuntos. Amás de los agradecimientos a personal técnicu y de producción, a los demás nominaos y a Paco Álvarez, Varela sorrayó la importancia d’un sector económicu que va más allá de los músicos y aprovechó’l premiu pa reivindicar lo «difícil de cantar n’asturianu con toles trabes que nos ponen por cuenta d’una llingua que nun fai dañu nengún». Asina ye como pidió la oficialidá del idioma y s’alcordó tamién de «la xente que ta pasándolo mal en munchos sitios non namás poles desgracies naturales, sinón tamién poles desgracies causaes pola mano humana en tol mundu». Llueu del so discursu, interpretaron otra vegada «Odisea la nuí», esta vegada sonando al completu.

Semeyes cedíes por Isabel Lobo Huerta.

Suscríbite a les nuestres novedaes

Llista d'espera Vamos informate cuando recibamos unidaes. Por favor déxanos embaxo una dirección válida de corréu electrónicu.