Néstor Díaz González, Marina Carbajosa González, Aquilino Fernández González, Carlos Velasco Montes, María Luisa Martínez Suárez y Lorena Corripio López son los seis intérpretes que van subir al escenariu del Teatru Nuevu de La Felguera güei, vienres 22 de payares a les 19h na tercer y última semifinal del Premiu Obdulia Álvarez La Busdonga d’Asturianada. La Conseyería de Cultura, Política Llingüística y Deporte convoca esta reconocencia destinada a promover y difundir la canción asturiana, una de les manifestaciones culturales más significatives del país que se declaró Bien d’Interés Cultural de calter inmaterial en 2015.
Néstor Díaz González ye un llaniscu de 14 años que lleva la metá de la so vida averáu a la canción asturiana. Na so familia enxamás hubo afición, pero un primer contactu na escuela, preparando la visita de la TPA pal programa Fálame, fixo que l’asturianada calare pa siempre nél y que s’animare a recibir enseñances de técnica vocal y de repertoriu de la mano d’Anabel Santiago. Ye ella la que-y da la oportunidá de debutar nun escenariu a les dos selmanes de la so primer clas. Anabel ye’l so gran referente xunto a Sergio Agüeros.
A Marina Carbajosa González había cosa que más-y prestare con 5 o 6 añinos que sentir a so güelu José Ramón cantar asturianada y ver con él los programes del xéneru na TPA. Asina foi faciéndose grande l’afición d’esta moscona de 16 años qu’a los 9 díxo-y a so madre que quería cantar como les sos cantadores de referencia: La Busdonga, M.ª Luz Cristóbal o Anabel Santiago. Con esta última empezó la so formación na Escuela de Música d’Uviéu, que depués siguió con Celestino Rozada y anguaño con Ismael Tomás. Debuta nel Auditoriu Teodoro Cuesta de Mieres nun festival de voces moces y dende’l 2021 empieza a sobresalir na so categoría.
Aquilino Fernández González naz en Rondera (Llangréu), en 1959. Esti mineru, retiráu depués de 27 años baxando al pozu, recuerda con cariñu cómo l’asturianada lu acompañó en cásique tolos momentos de la so infancia. Empieza nel añu 1975 col grupu de coros y dances de L’Entregu y dende entós arranca l’andadura pelos concursos de canción asturiana, onde compartió tables con figures de la talla de Laudelino García Palicio, Agustín Argüelles o José Fernández García (el Tordín de Frieres). Anguaño ye l’intérprete más veteranu n’activo ente toles persones que participen nos concursos y ún de los pocos que canta melodíes y lletres de composición propia nel so repertoriu.
La trayectoria de Carlos Velasco Montes, natural de Bimenes, empieza’l día que xube la primer vez al escenariu nun homenaxe que-y fixeren a so pá Daniel Velasco, cantador d’asturianada reconocíu. Naide en so casa sabía entós de les bones cualidaes pa la canción asturiana d’esti yerbatu, que dexó al públicu ablucao y a so pá enllenu d’emoción. Empieza compitiendo n’aficionaos nel añu 2009 y dende entós foi construyendo un palmarés con premios importantes.
L’arranque de María Luisa Martínez Suárez na canción asturiana naz de la casualidá. Materia prima había, lo que necesitaba yera daquién que la enseñare y ye nesi momentu cuando apaez na so vida Ismael Tomás, el so gran maestru. Al poco empieza a participar como aficionada nos concursos y ensiguida debuta na categoría absoluta. Ente les sos voces de referencia tán La Busdonga, artista que da nome a esti premiu, y M.ª Luz Cristóbal Caunedo, anque hai munches otres cantadores qu’influyeron na so carrera, como Mariceli o Nori Redondo.
Lorena Corripio López llega de Carrandi (Colunga) con una trayectoria llarga y enllena de reconocimientos. Siempre sintió cantar porque so güelu Eduardo cantaba asturianada y xunto a él percorrió munchos concursos, siguiendo a los grandes cantadores del momentu. Quixo’l destín que nuna edición del campeonatu de Xixón la so vida se cruciare cola d’Ismael Tomás. Xunto a él dio los primeros pasos y deprendió a desenvolvese nos escenarios. D’entós p’acá foi llabrando un palmarés nel que tien más de 40 primeros premios nos concursos principales del país.
Próxima cita: la final
El 29 de payares el Teatru de La Llaboral de Xixón va acoyer la gala final d’esti certame que va repartir 15.000 euros en tres categoríes: 6.000 euros pa la categoría femenina, 6.000 euros pa la masculina y 3.000 euros pa la de mocedá (menores de 22 años). Con esti premiu nuevu, la Conseyería busca reconocer y valorar «la tradición tan rica de l’asturianada y el llabor d’aquelles persones que caltienen viva esta forma d’arte», amás de «fomentar l’usu de la llingua asturiana, promoviendo la so normalización y espardimientu al traviés de la música». D’esta forma, el xuráu va evaluar el desempeñu de les persones cantantes teniendo en cuenta los criterios que s’especifiquen nes bases que se publicaron nel BOPA. Estos son la conducta y actitú escénica, la entonación y afinación, la calidá d’emisión y dicción vocal, la ornamentación y matización; la dificultá y variedá d’estilos y la calidá llingüística.
Suscríbite a les nuestres novedaes
