Gaiteros ye’l nuevu trabayu discográficu de la Banda Gaites Fonte Fuécara. Esti conxuntu de Pruvia -Llanera- celebra esti añu’l 45 aniversariu del so nacimientu. Falar de Fonte Fuécara ye referise al frutu de la escuela gaitera del mayestru Pedro Pangua nel conceyu Llanera; una formación apegada a un repertoriu y a un sonar determináu, que conforma yá una tradición en sí mesma d’un pesu perimportante nel panorama de la gaita asturiana. Nel conxuntu destaca l’altu dominiu téunicu de los sos músicos a nivel solísticu y un soníu definíu poles gaites feches por Alberto Fernández –padre y fíu– y tambores y bombos tradicionales de José Castaño, Andrés Valdés y Pablo Lorenzo.
Aquella esencia qu’amosaben trabayos anteriores como Banda de Gaites Fonte Fuécara (1990), Remanecer (1994), Faciendo estaya (1997) y Caltener (2010) fáese palpable en Gaiteros (2024), nel que trece gaiteros y cuatro percusionistes ficieron esti llabor nos Tutu Estudios d’Avilés, baxo la dirección musical de Rodrigo Molinos y Fabián Fernández. Dalgo a destacar ye’l total de diecinueve collaboradores; instrumentistes y cantantes de primer orden dientro del panorama musical que se sumen a esti trabayu, como Marisa Valle Roso, Héctor Braga, Jacobo de Miguel, Xosé Antón “Ambás”, Javi Tejedor o Rubén Bada, ente otros. Sicasí, resérvase un espaciu especial a mou d’homenaxe pa Elías García, qu’abordó el llabor de producción musical del trabayu hasta’l momentu de la so muerte, non ensin enantes dexar nél abondes muestres del so buen facer como músicu.
Los temes del discu organícense en conxuntos de pieces que rinden tributu a dellos mayestros gaiteros que ficieron d’esllabón necesariu nel caltenimientu y esparcimientu de la cultura de la gaita. Al traviés d’esti filu conductor, entama’l discu col corte ‘Remanecer‘, a mou de guiñu al segundu trabayu discográficu de la banda. Esti tema ta dedicáu a Manuel Rodríguez Osorio “Manolo Quirós” (Ricao, Quirós, 1949 – 2001), Pedro Pangua Rivas (Uviéu, 1962) y Luis Joaquín Amieva Celorio “Xuacu Amieva” (El Mazucu, Llanes, 1954). La pieza ‘Remanecer‘ emplega tres sones: ‘Lamento’, tema col que tamién abriera Quirós el so discu Latidos de mi tierra (2000) y que yá presentara En un país de norte (1986); ‘Pasucáis de An Oriant’, un guiñu de Pangua a la tierra bretona que los recibió delles vegaes nel so Festival Intercélticu de Lorient; y ‘Muñeira de Paula’, melodía qu’abre’l discu Lluna caldiá y que Xuacu Amieva dedicaba-y a la so fía.
Continúa esti trabayu con un recuerdu pa José Francisco Galán Trespalacios “Pancho Galán”, o “el gaiteru de Llonín” (Llonín, El Valle Altu de Peñamellera, 1917 – 2000), al traviés d’ ‘Oriente‘. El cantar amuesa’l tradicional vezu d’amestar bailles a lo suelto de métriques ternaries y binares baxo nomes como «la xota» y «lo mudao». Foron arreglaos por Rodrigo Molinos, direutor de la formación y alma mater de la mesma, tomando de referencia delles grabaciones del Archivu de L’Andecha Folclor d’Uviéu. Sigue ‘Lliberdón‘, col popular cantar de ‘La panadera’ y una ‘Muñeira cantada’ na versión de Ramón García Tuero, “el gaiteru Lliberdón” (Arroes, 1864 – 1932), imitáu nel arte de cantar y tocar a un tiempu pol polifacéticu músicu Héctor Braga Corral. El cuartu tema ta dedicáu al lleonés Nemesio Alonso Álvarez (Torrestío, 1924 – 2022), depositariu de la tradición de gaita y curdión del centru-sur d’Asturies y Babia. D’esti mayestru interprétanse un pasudoble y unes rumbes.
El viaxe musical sigui con ‘Arnizo‘, un guiñu a dos gaiteros de Mieres que foron perconocíos solistes, acompañantes d’asturianada y facedores de gaites: Luis Argüelles Díaz “Luis d’Arnizo” (Arnizo, Mieres, 1924 – 2006) y José González Álvarez “José La Piedra” (Mieres, 1861 – 1949). Del primeru tócase un ‘Entemediu de misa’ y, del segundu, ‘La marcha de l’alegría’, nun arreglu d’Elías García. El sextu corte tituláu ‘Clemente‘ ye un homenaxe a Clemente Díaz López “Ferreira” (Vilauxín, Negueira de Muñiz, Lugo, 1920 – 2015), gaiteru de ricu y perinteresante repertoriu de tradición asturiana y gallega, qu’amás residió nos sos últimos díes nel propiu conceyu de la banda que lu homenaxea y a la que sintió tocar en delles vegaes. El tema amiesta una versión de la perconocía ‘Alborada de Veiga’, un ‘Agarráu’ y una ‘Muñeira’ d’esmeráu arreglu. De siguío, topámonos con un homenaxe a la tradición gaitera de Cangas del Narcea al traviés de ‘Los son de arriba‘, míticu conxuntu de gaites al que pertenecieron Ernesto García Rodríguez “Neto” (Cangas del Narcea, 1934 – 2018), autor del tema ‘La Feriona’, y José García Tejón “Fariñas” (Sienra, 1918 – 1990), al que se-y recoyó la ‘Xota Cangas’ qu’interpreten. Dambos foron herederos d’una tradición na que rescampló pol so virtuosismu Dionisio López “Dionisio de la Riela” (La Riela, Cangas del Narcea, 1901 – 1980), del que se toma un popular ‘Agarráu’. La maestría de Fabián Fernández y Indalecio Santos, al saxofón barítonu y al clarinete, dan-y al tema la gracia inconfundible que gastaben aquellos gaiteros cangueses.
El “Gaiteru de Veriña”, nome artísticu de José Antonio García Suárez (Poago, Xixón, 1928 – 2006), tien tamién un sitiu nesti trabayu. Precisamente, “Veriña” ta xuníu a Llanera al traviés del maxisteriu que tuvo nél el gaiteru David Alonso, por tener debutao artísticamente en Pruvia y por tenelu acompañao al tambor Luis Sarilles, de Santa Rosa. Fonte Fuécara lu recuerda amestando tres temes suyos. El primeru ye ‘Anda y señálame un sitiu’, un cantar adaptáu a asturianada por Obdulia Álvarez “La Busdonga”, a quien “Veriña” llegó a acompañar cuando yera rapaz. Nesti casu, ye Marisa Valle Roso quien-y pon voz xunto al pianista Jacobo de Miguel, pa dar pasu a una brillante interpretación del gaiteru solista Pedro Aínsua Cianca y a la que se suma’l restu la banda nos sones del ‘Ofertoriu’ y ‘Pasucáis’.
Como amuesa de mestizaxe tenemos el corte dedicáu al que fuera Gaiteru Mayor d’España: José Remis Ovalle (Margolles, 1910 – 1987). D’esti músicu recuéyense delles versiones d’ ‘Habanera guajira’, testimoniu d’aquelles melodíes d’ida y vuelta, y la ‘Muñeira de Xixón’. Nellos destaca un arreglu qu’enfatiza nel matiz rítmicu y na ornamentación, especialmente na ‘Habanera guajira‘, onde resalta l’estilu d’un gaiteru de muncha personalidá musical: Daniel Fernández.
Esta riestra de temes de mayestros gaiteros zárrase con dos aportaciones compositives de gaiteros contemporáneos. Unu ye ‘Forcón‘, de Fabián Fernández Fernández (Posada Llanera, 1993), codireutor de la formación con Rodrigo Molinos y ún de los primeros titulaos en Grau Superior en Gaita Asturiana. Trátase d’un orixinal cantar d’aires inspiraos na tradición y que lleva’l nome d’un regueru de Pruvia. La presencia de los vientos metales aportan-y al arreglu pa gaita un arriquecimientu nel planu armónicu que-y apurre una atmósfera perinteresante. L’otru tema titúlase ‘Cuaña‘, de Javier Tejedor Mier (Avilés, 1974), y ta formáu poles ‘Marches pa Fonte Fuécara’ y el ‘Pasucáis de Cuaña’. Ye un set de temes con muncha enerxía, enllenu de matices que nun pue negar el sellu personal del so autor, mesmo no creativo como na interpretación col curdión. Pa finar, topámonos con un bonus track que pon el ramu per tolo alto al trabayu. Lleva por títulu ‘Maruxina de Santibanes‘, una muñeira recoyía pol Archivu de Tradición Oral d’Ambás y que la banda gaites interpreta acompañada del grupu Tuenda.
Gaiteros ye un testimoniu de reconocencia pa tolos mayestros qu’engrandecieron esti instrumentu col so facer. Pero, per enriba de too, el propiu discu ye’l meyor homenaxe a 45 años de dedicación y esfuerciu sosteníu polos pilares de la tradición y de la búsqueda de la escelencia al traviés de l’alta calidá de los sos músicos, l’emplegu d’instrumentos tradicionales, un traxe’l país alloñáu de la uniformidá y l’apuesta por un repertoriu basáu na tradición musical asturiana.
Suscríbite a les nuestres novedaes
