Yá ta en toles plataformes musicales La Llobera, el segundu trabayu discográficu de Llevólu’l Sumiciu. El dúu d’electrónica de raigañu presenta cinco temes nos qu’hai composiciones propies, reellaboraciones de pieces tradicionales y unes influencies sonores que van dende l’asturianada y les vaqueires hasta’l dembow y los ritmos afrollatinos. Too ello col telón de fondu de la historia d’Ana María García ‘La Llobera’.
Dempués d’adelantar en branu’l single ‘Divina‘ -pieza basada nun cantar del mesmu nome grabáu por Mapi Quintana y Elías García nel álbum Severina (2014)- y d’asoleyar n’ochobre ‘Medio la mar’ – nel qu’amesten música trap y jersey club con una vaqueirada de L.laciana na voz de la intérprete d’asturianada Alicia Villanueva-; el dúu formáu polos hermanos Pablo y David Alonso llanza tolos temes que dan forma al EP. Nél rescampla una madurez del so soníu, una propuesta más rítmica y la inclusión per primer vez de composiciones orixinales dafechu nos cortes ‘Nacida de la bruma’. Esti tema tien dos partes -qu’abren y piesllen l’EP- y nél pon voz y lletra Neurora, cantante que yá collaborara con ellos nel tema ‘Ronzón’. Tamién suena sampleada la voz del cantador de tonada Juanín de Mieres (1905-2003) en ‘Mio madre como era probe’.
Otra de les novedaes ye que tamién ye un álbum conceptual. El puntu d’alcuentru ye la lleenda d’Ana María García ‘La Llobera’, llanisca xulgada doblemente nel sieglu XVII: pola inquisición y pola sociedá, que nun aceptaba qu’una muyer quixere ser llibre, tamién no tocante a l’amor. D’esta manera, Llevólu’l Sumiciu escoyeron temes de los yá teníen fechos que pudieren rellacionase con esta historia y les lletres de ‘Nacida de la bruma’ traten esta cuestión, incluyendo amás pasaxes del cómic Ana María. La llobera d’Asturies, obra cola que Guillermo Menéndez Quirós algamó’l Premiu Alfonso Iglesias de Cómic en 2022.
Una carrera n’ascensu
Cola publicación d’esti segundu EP, la formación qu’amesta música tradicional asturiana, electrónica y audiovisuales sigue’l camín qu’abrió en 2020 cola publicación del single ‘Saldiguera‘, continuó col EP Entaína (2021), cola so participación nos compilatorios Al Son del Cantar (2022), Semando Son y Codex Futura, Vol. 3; y col remix d’Ente la niebla de Dixebra -estes tres últimes referencies en 2023-. Amás d’esto, yá pisaron escenarios mui destacaos como’l del Festival Interceltique de Lorient, el Prestoso Fest o la Folixa na Primavera, ente munchos otros. Precisamente’l so próximu conciertu va ser nun eventu mui destacáu pa tolos siguidores de la música de raigañu: el 7 d’avientu na Foliada de Fonsagrada (Galicia). Con La Llobera, Llevólu’l Sumiciu siguen avanzando nuna carrera ascendente a la que, por suerte, quéda-y tovía muncho percorríu.
Suscríbite a les nuestres novedaes
