Como tolos años, la Banda Gaites LaKadarma vuelve col so orixinal almanaque. Pal 2025, celebrando los doce años de la banda y les doce causes que defendieron colos kalendarios, dediquen un mes a caún d’ellos, con semeyes inédites, obra de Leticia Cernuda. L’almanaque pue mercase nos puntos de venta de LaKadarma, amás de na tienda online de musicasturiana.com, na so oficina de Xixón y na tienda de Puru Remangu n’Uviéu.
Ye un almanaque, como davezu, en tamañu A3 y compuestu por 7 fueyes peles dos cares, qu’inclúi los meses en grande y los sos recuadros p’apuntar l’axenda y los planes de caún. Asina presenta LaKadarma esti Kalendariu 2025 12 meses, 12 kauses:
«Doce años d’ElKalendariu.
Doce años d’esistencia de LaKadarma.
DOLCE.VITA
Siempre con una causa pa defender. A vegaes tapecida, a vegaes esplícita.
Siempre coles causes de les minoríes, qu’a la fin son los derechos de la mayoría.
Aprovechando que’l Pigüeña pasa per (cerca) Xabriz, esti añu dedicamos cada mes a ún de los kalendarios, con semeyes inédites.
Que vos preste y que vos acompañe l’enfotu de LaKadarma en construyir un mundu meyor.
Gracies.
P.D: Xineru de 2026 de regalu. Nun tenéis que dar les gracies, foi en defensa propia»




