Dende esta selmana yá ta disponible en toles plataformes musicales Caltener, el discu qu’asoleyó la Banda Gaites Fonte Fuécara en 2010 baxo la dirección musical de Rodrigo Molinos y la producción de Lisardo Prieto. Cola dixitalización d’esti trabayu por parte de Musicasturiana.com, el patrimoniu musical asturianu sigue espardiéndose per tolos países del mundu.
Fonte Fuécara fundóse nel añu 1979 en Pruvia (Llanera) col envís d’esparder y, precisamente, caltener, el patrimoniu tradicional asturianu, dende lo musical a la indumentaria, ensin escaecer el baille. 45 años dempués, la formación asoleyó l’álbum Gaiteros, un homenaxe a los maestros del instrumentu con composiciones inédites, melodíes tradicionales y una montonera collaboraciones.
L’anterior discu, Caltener (2010), ye un exemplu del percorríu de la banda y la so manera d’entender el folclor y la música. Nél pueden sentise reinterpretaciones y igües de pieces tradicionales d’Asturies -pero tamién de Bretaña, Galicia o Canadá-, composiciones de Pedro Pangua, Lisardo Prieto y Fernando Menéndez Viejo; y collaboraciones de dellos músicos y dalgunes de les voces más conocíes nel país como Chus Pedro y Anabel Santiago.
Suscríbite a les nuestres novedaes
