Dempués de dar anuncia de van compartir escenarios y del so caberu conciertu en La Salvaje d’Uviéu nel últimu fin de selmana de 2024, Ferla Megía y Llevólu’l Sumiciu van actuar en Xixón. Estos dos nomes orixinales y mozos de la música asturiana d’anguaño, tres d’asoleyar en payares los sos nuevos EP y de la mano de l’axencia Lacre, van tocar na sala Tizón Sound el sábadu 19 d’abril dende les 20.30h, un conciertu pal que les entraes yá tán disponibles pa mercar.
Ferla Megía va poner enriba l’escenariu’l so últimu trabayu, Páxaros 01, un EP qu’espeya la so evolución como artista hacia un estilu qu’amiesta xéneros como’l folk, el dembow, el trip hop y la electrónica. A la fin, la fusión ente la tradición asturiana y les tendencies d’anguaño. Llevólu’l Sumiciu, pel so llau, tán tamién acabantes d’asoleyar un EP, La Llobera, un discu qu’homenaxea a la mitoloxía y la música de raigañu asturiana nun contestu d’eleutrónica con ritmos y sonoridaes del dembow afrolatinu y el Jersey club. Los audiovisuales completen el so espectáculu.
Suscríbite a les nuestres novedaes
